Шъолъыр 15-мэ къарыкIыгъэ кIэлэцIыкIуи 120-рэ Адыгеим ия ХХХ-рэ Гъэмэфэ хьисап еджапIэ щызэIукIагъэх.

Джырэблагъэ АКъУ-м изыгъэпсэфыпIэу «Горная легенда» зыфиIорэм ар къыщызэIуахыгъ. Москва, Адыгеим, Баш­кирием, Къалмыкъым, Чэчэным, Краснодар ыкIи Ставрополь крайхэм, Астраханскэ, Волгоград, Воронеж, Ивановскэ, Курскэ, Москва, Ростов ыкIи Саратов хэкухэм кIэлэцIыкIу акъылы­шIохэр къарыкIыгъэх. МэфэкI Iофтхьабзэм хэлэжьагъэх Гъэмэфэ хьисап еджа­пIэм изэхэщакIоу, АКъУ-м иректорэу Мамый Даутэрэ лъэпкъ ушэтын уни­верситетэу «Экономикэм иапшъэрэ еджапI» зыфиIорэм ипащэу Никита Анисимовымрэ.
Гъэмэфэ хьисап еджапIэхэр Адыгеим 1995-рэ илъэсым къыщыублагъэу щызэхащэх, илъэс 30-м ахэм яIофшIэн кIэлэцIыкIу мини 3-м ехъоу тикъэралыгъо ичIыпIэ зэфэшъхьафхэм къарыкIыгъэхэр хэлэжьагъэх. Адыгеим и Гъэмэфэ хьисап еджапIэхэр къазэрахэщыхэрэр кIэлэегъаджэхэмрэ еджакIохэмрэ азыфагу творческэ зэдэлэжьэныгъэ ин зэ­рилъыр, шэпхъэ лъагэхэм адиштэу ыкIи бэрэ зэрэрагъаджэхэрэр ары.

Республикэ программэу «КIэлэцIыкIу акъылышIохэр» зыфиIорэм диштэу Iоф­тхьабзэр зэхащэ.ЗэхэщакIохэр — АР-м гъэсэныгъэмрэ шIэныгъэмрэкIэ и Минис­терствэрэ Республикэ естественнэ-хьисап еджапIэмрэ.
Гъэмэфэ хьисап еджапIэр тхьамэфищ зэрэкIорэр, апэритIур рейтинг системэкIэ, аужырэм хэушъхьафыкIыгъэ курсхэу хьисапым нэмыкI Iофыгъохэри къызэлъызыубытыхэрэмкIэ рагъэкIокIых.
Программэм хэхьэх олимпиадэ хьиса­пымкIэ егъэджэнхэр, хьисапымкIэ ыкIи ащ иедзыгъохэмкIэ хэушъхьафыкIыгъэ курсхэр, хьисап джэгунхэр. Ухьазырыныгъэу ыкIи ныбжьэу яIэм ялъытыгъэу кIэлэцIыкIухэр куп-купэу лъэныкъо зэ­фэшъхьафхэмкIэ агощых: езыгъэжьэгъэ­кIэ олимпиадэ купыр, нахьыкIэ олим­пиадэ купыр, гурыт олимпиадэ купыр, нахьыжъ олимпиадэ купыр ыкIи зэнэ­къокъу-олимпиадэ купыр.

ЕджапIэм икIэлэегъаджэхэм ахэхьэх АКъУ-м ыкIи нэмыкI апшъэрэ еджапIэ­хэм якIэлэегъаджэхэу, ястудентхэу блэ­кIыгъэ Гъэмэфэ еджапIэхэм ахэлэжьагъэ­хэр, АКъУ-м и Кавказ хьисап гупчэ иIофышIэхэр, Республикэ естест­веннэ-хьисап еджапIэм ыкIи Адыгеим инэ­мыкI гъэсэныгъэ организациехэм якIэлэегъа­джэхэр, Урысыем ишъолъыр зэфэшъхьафхэм Iоф ащызышIэрэ егъэ­джакIохэр, урысые, дунэе зэнэкъокъу­хэм щатекIуагъэхэмрэ къащыхагъэщыгъэхэм­рэ.
Зэрэрагъэджэщтхэм нэмыкIэу еджапIэм зэщтегъэу программэри къыщыдэ­лъытэгъэщт. Арт-фестиваль ыкIи узы­гъэ­гупшысэрэ спектаклэу «Детектив-шоу» зыфиIорэр, квестхэр, экскурсиехэр зэ­ха­щэщтых, кино къафагъэлъэгъощт, къа­шъохэмкIэ, фиджитал-спортымкIэ ыкIи лазертагымкIэ зэнэкъокъухэр апэрэу зэхащэщтых.
Адыгэ Республикэм и ЛIышъхьэ
и пресс-къулыкъу