Урысыем и Пре­зидентэу Владимир Путиным пшъэрылъ къызэрэфишIыгъэм тетэу Адыгеим и ЛIышъхьэу КъумпIыл Мурат къэралыгъом ипащэ ишъолъыр приемнэ цIыфхэр щы­ригъэблэгъагъэх.

ЗэIукIэгъум хэлэжьагъэх фе­деральнэ инспектор шъхьаIэу Сергей Дрокиныр, АР-м ипрокурорэу Игорь Шевченкэр, му­ниципалитетхэм япащэхэр.
Къалэу Мыекъуапэ, Тэхъутэмыкъое ыкIи Джэджэ районхэм ащыпсэухэрэр ащ къекIолIагъэх. Iофыгъоу зыгъэгумэкIыхэрэм ащыщхэм социальнэ мэхьанэ яIагъ, ахэм ахэхьэх инфраструктурэм хэхъоныгъэ егъэшIыгъэныр, общественнэ чIыпIэхэр, кIэлэцIыкIу джэгупIэхэр зэтегъэ­псыхьэгъэнхэр ыкIи нэмыкIхэр.
Къуаджэу АдыгеякIэм щы­псэурэ бзылъфыгъэм илъэIу зыфэгъэхьыгъагъэр а псэупIэм иурамхэм ащыщым изэтегъэ­псыхьанкIэ, джащ фэдэу кIэлэцIыкIу джэгупIэр джырэ шап­хъэхэм адиштэу шIыгъэнымкIэ къадеIэныр ары.
Муниципальнэ образованиеу «Тэхъутэмыкъое районым»
ипа­щэу Шъэо Аскэр къызэри­Iуа­гъэмкIэ, метрэ 700 фэдиз икIы­хьагъэу урамэу Краснэм илъэсрыкIо гъогу, джащ фэдэу кIэлэцIыкIу джэгупIэр зэтегъэ­псыхьэгъэнхэм апае шIэгъэн фаехэр администрацием ри­хъухьэгъахэх. Мы илъэсым шэ­кIогъум нэс ахэр гъэцэкIагъэ хъунхэу ары зэрэгугъэхэрэр.
Адыгеим и ЛIышъхьэ пшъэ­рылъ афишIыгъ IофшIэнхэр агъэ­нэфэгъэ пIалъэхэм ашIомыкIхэу ыкIи дэгъоу агъэцэкIэнхэу. Джэджэ районым ипащэу Андрей Таранухинми ащ фэдэ пшъэрылъхэр фашIыгъэх. Нафэу зэрэщытымкIэ, псэупIэу Джа­джэм дэт еджапIэу N 3-м къыпэблагъэу урамэу Набережнэм игъогу 2024-рэ илъэсым шэкIогъум нэс агъэцэкIэжьынэу щыт. Муниципалитетым щыпсэурэ бзылъфыгъэм а лъэIумкIэ за­къыфигъэзагъ.
Мыекъопэ къэлэ IэзапIэм къыпэIулъ чIыпIэу урамэу Чкаловым щыщым изэтегъэпсы­хьанкIэ республикэм и ЛIышъхьэ къадеIэнэу зыкъыфигъэзагъ Мыекъуапэ и ТСЖ итхьаматэ. Къалэу Мыекъуапэ имэрэу Геннадий Митрофановым къызэриIуагъэмкIэ, мы илъэсым ыкIэм ехъулIэу а чIыгу Iахьыр зэтырагъэпсыхьащт. Адыгэ Рес­публикэм гъогухэмкIэ и Фонд ахъщэр къыхагъэкIыщт.
ИкIэухым лъэIу тхылъыр къэ­зыгъэхьыгъэ бзылъфыгъэм игъунэгъубэхэм, республикэм икъэлэ шъхьаIэ зэхъокIыны­гъэшIухэр зэрэфэхъухэрэм, общественнэ чIыпIэхэр зэра­гъэкIэжьхэрэм апае цIыфыбэмэ ацIэкIэ АР-м и ЛIышъхьэ зэрэ­фэразэр къыIуагъ.
«Тэ ренэу общественностыр кIэщакIо зыфэхъурэ Iофтхьа­бзэхэм адедгъэштэщт, муниципалитетхэм тадеIэщт. Социальнэ ыкIи инженер инфраструктурэм изегъэушъомбгъун лъыд­гъэкIотэщт, еджапIэхэр, кIэлэцIыкIу IыгъыпIэхэр, спорт гуп­чэхэр тшIыщтых ыкIи дгъэцэ­кIэжьыщтых. Мыщ дэжьым къэ­Iогъэн фае псэуалъэу IофшIэнхэр зэпхыгъэхэм къапэIулъ чIыпIэхэри зэрэзэтедгъэпсыхьа­жьыщтхэр. ТшIэрэр зэкIэ цIыф­хэм яфедэхэм адиштэу зэшIотхын фае», — къыхигъэщыгъ КъумпIыл Мурат.
Республикэм и ЛIышъхьэ зигъо Iофыгъоу цIыфхэр зыгъэ­гумэкIыхэрэр, УФ-м и Президентэу Владимир Путиным и Джэпсалъэ къыщигъэнэфэгъэ пшъэрылъхэр зэшIохыгъэ хъунхэм мэхьанэшхо зэряIэм муниципалитетхэм япащэхэм анаIэ тыраригъэдзагъ.
АР-м и ЛIышъхьэ ипресс-къулыкъу