НыбжьыкIэхэм я Мафэ ихэгъэунэфыкIын епхыгъэ Iофтхьабзэхэр Мые­къуапэ щыкIуагъэх.

Лениным ыцIэкIэ щыт гупчэм мастер-классхэр, предприниматель ныбжьыкIэхэм яермэлыкъ­хэр, якъэгъэлъэгъонхэр, гумани­тар, спорт, цIыфхэр жъугъэу зыхэлэжьэгъэхэ культурнэ ыкIи нэмыкI Iофтхьабзэхэр щызэхащагъэх. Республикэм имуниципалитетхэм, иапшъэрэ еджапIэхэм ыкIи иколледжхэм ялIы­кIохэри ахэм ахэлэжьагъэх.
Адыгеим и ЛIышъхьэу КъумпIыл Муратрэ АР-м и Къэралыгъо Совет — Хасэм и Тхьаматэу Владимир Нарожнэмрэ Адыгеим иныбжьыкIэхэм афэ­кIорэ джэпсалъэу къашIыгъэм къыщыхагъэщыгъ Урысыем игъэ­пытэнкIэ ахэм япIун фэ­гъэхьыгъэ пшъэрылъышхохэр Президентэу Владимир Путиным къызэригъэуцугъэхэр.
МэфэкI Iофтхьабзэхэу студентхэр, гуфакIохэр, ныбжьыкIэ организацие ыкIи объединение зэфэшъхьафхэм ялIыкIохэр зы­хэ­лэ­жьагъэхэр, зэхэзыщагъэхэр Адыгэ Республикэм ныбжьыкIэ IофхэмкIэ и Комитет ары. Джащ фэдэу ахэм яIахь хашIыхьагъ ныбжьыкIэхэм я Урысые союз, студент отрядхэм, апэрэхэм я Движение, Адыгэ Хасэм иныбжьыкIэ къутамэ ыкIи НыбжьыкIэ парламентым ялIыкIохэм.

Къэзэрэугъоигъэхэм шIуфэс къарихызэ Адыгеим и ЛIышъхьэу КъумпIыл Мурат къыхигъэ­щыгъ республикэм иныбжьыкIэ­хэм еджэнымкIэ, спортымкIэ ыкIи общественнэ IофшIэнымкIэ гъэхъэгъэшхохэр зэрашIыгъэхэр.
«Шъо шъуишIоигъоныгъэкIэ гуфакIохэм ясатырэ шъухэхьэ, шъуичIыпIэгъухэм шъуадеIэ, шIушIэ IэпыIэгъур къэшъоугъои, тидзэкIолIхэм IэпыIэгъу ятыгъэ­ным фэгъэхьыгъэ шIушIэ Iоф­тхьабзэу зэрахьэхэрэми шъуа­хэлажьэ.Ащ къегъэлъагъо шъуи­хэгъэгу шIу зэрэшъулъэгъурэр, тиреспубликэ гупсэрэ хэгъэгум­рэ шъуишIуагъэ яжъугъэкIыным ыуж шъузэритыр. Адыгеим ихэ­хъоныгъэкIэ IэпыIэгъу шъу­зэрэхъурэм пае «Тхьашъуегъэ­псэу!» шъосэIо!», — къыIуагъ КъумпIыл Мурат.
Республикэм и ЛIышъхьэ къызэрэхигъэщыгъэмкIэ, джырэ мэфэкIыр ныбжьыкIэхэм ягъэ­хъагъэхэм ыкIи яамалхэм уасэ зэрафашIырэм ишыхьатэу щыт. Республикэм иныбжьыкIэхэм лъэныкъо пстэумкIи зэдиштэу хэхъоныгъэ ашIыным пае ама­лэу арагъэгъотыхэрэм къате­гущыIэзэ КъумпIыл Мурат къызэрэхигъэщыгъэмкIэ, Адыгеим, зэрэхэгъэгоу зэрэщыщытым фэдэу, цIыфыгъэ шапхъэхэм арыгъозэрэ, культурнэ кIэныр къэзыухъумэрэ ыкIи зихэгъэгу фэшъыпкъэ ныбжьыкIэхэр пIугъэнхэм иIахь хешIыхьэ.

Ресурс гупчэу «Адыгеим игуфакIохэр» зыфиIорэм непэкIэ нэбгырэ мин 56-рэ фэдиз хэхьэ. Ащ инахьыбэр ныбжьыкIэх. Ахэм игъоу алъэгъурэ Iоф­тхьабзэхэр пхырыщыгъэнхэм­кIэ, сэнаущыгъэ зыхэлъ ныб­жьыкIэхэм Iоф адэшIэгъэнымкIэ республикэм амал зэфэ­шъхьафхэр щарагъэгъотых.
Адыгеим и ЛIышъхьэ анахьэу анаIэ зытыраригъэдзагъэр лъэ­ныкъо пстэумкIи республикэм иныбжьыкIэхэм IэпыIэгъу зэра­фэхъущтхэр ары. Псауныгъэ пытэ, щыIэкIэшIу яIэнэу, ямурад дахэхэр щыIэныгъэм щыпхы­ращынхэу ныбжьыкIэхэм ар афэлъэIуагъ.
Мы Iофтхьабзэм илъэхъан Адыгеим и ЛIышъхьэу КъумпIыл Мурат Адыгеим ирайонхэм, иныбжьыкIэ организациехэм ыкIи объединениехэм къагъэ­хьазырыгъэ чIыпIэхэм ащыIагъ, муниципалитетхэм ялIыкIохэм ыкIи анахь чанэу зыкъэзыгъэлъэгъогъэ ныбжьыкIэхэм гущы­-Iэгъу афэхъугъ.
Пчыхьэм концерт шъхьаIэр зыщыкIорэ чIыпIэм эстрадэм иартистхэм ыкIи творческэ коллективхэм якъэгъэлъэгъонхэр щыкIуагъэх. МэфэкIым икIэухым адыгэ джэгу щыIагъ.
АР-м и ЛIышъхьэ ипресс-къулыкъу
Сурэтхэр: А. Гусев.