Спортивнэ журналистым и Маф
Бэдзэогъум и 2-м спортивнэ журналистым и Дунэе мафэ тыди щыхагъэунэфыкIы.
Спортивнэ прессэм и Дунэе ассоциацие (АИПС) 1924-рэ илъэсым бэдзэогъум и 2-м Париж щызэхащэгъагъ. Джыдэдэм журналистхэм ясоюзи 150-рэ фэдиз ащ хэхьэ, Урысыем испортивнэ журналистхэм я Федерации ахэм ащыщ.
Спортивнэ журналистхэм яассоциациехэмрэ АИПС-мрэ мэфэкI зэхэсыгъохэр мыщ фэдэ мафэхэм зэхащэх, спортым ылъэныкъокIэ къэбарлъыгъэIэс амалхэм яIофышIэ анахь дэгъухэр агъашIох, тедзэгъу заулэмэ спорт Iофтхьабзэхэр зэхащэх. Мы мафэм спортивнэ журналист анахь дэгъухэр Урысыем щагъашIох.
Республикэ гъэзетэу «Адыгэ макъэм» иобозревателыгъэу ЕмтIылъ Нурбыйрэ республикэ гъэзетэу «Советскэ Адыгеим» испортивнэ обозревателыгъэу КIыкI Ибрахьимэрэ Адыгеим испортивнэ журналист анахь цIэрыIохэу плъытэмэ хъущтых. Ахэм ядунай зэрахъожьыгъэр гухэкI, мыщ фэдэ мэфэкI мафэм ягугъу Адыгеим шIукIэ щашIынэу тэгугъэ.
Спортивнэ журналистхэм ямэфэкIкIэ тафэгушIо, акIуачIэ къыкIимычынэу, щэIагъэ ахэлъынэу, яIофшIэн мыпсынкIэ ренэу гухахъо хагъотэнэу тафэлъаIо!