Кощхьэблэ районым ит еджапIэхэм ащыщ горэм лагъымэ чIалъхьагъэ фэдэу мы илъэсым имэлылъфэгъу мазэ хэгъэгу кIоцI IофхэмкIэ къулыкъухэм макъэ къарагъэIугъагъ. ЕджапIэм ипащ ары ащ фэдэ къэбарыр полицием къыIэкIэзыгъэхьагъэр. Пэщэныгъэ зыдызэрихьэрэ еджапIэм иэлектрон почтэ къихьэгъэ тхыгъэм къагъэорэ пкъыгъохэр яеджапIэ къычIалъхьагъэхэу итыгъ.

ХэбзэухъумэкIо къулыкъу­хэм яIофышIэхэм уплъэкIунхэр псынкIэу зэхащагъэх, ау специалистхэм къагъэорэ пкъыгъо гори еджапIэм къычIагъотагъэп.
ХэбзэухъумэкIо къулыкъу­хэм яIофышIэхэм зэхащэгъэ оперативнэ Iофтхьабзэхэм нафэ къашIыгъ илъэс 12 зыныбжь Iэтахъом электрон почтэм къэ­бар нэпцIыр зэрэригъэхьагъэр.
КIэлэеджакIом янэ-ятэхэм якIалэ пIуныгъэ тэрэз зэрэрамыгъэгъотыгъэм пае пшъэ­дэкIыжь арагъэхьыгъ. Ежь Iэтахъор Урысыем и МВД имуниципальнэ отдел иподразделениеу зыныбжь имыкъугъэхэм яIофхэм афэгъэзагъэм иучет хагъэуцуагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ республикэм исхэми, ихьакIэхэми агу къегъэкIыжьы «телефон терроризмэм» пыхьэхэ зэрэмыхъущтыр. Ны-тыхэр мыщ фэдэ IофыгъомкIэ зыныбжь имыкъугъэ якIэлэцIыкIухэм адэгущыIэнхэ, зекIокIэ пхэндж къызыхагъафэ зэрэмыхъущтыр агурагъэIон фае.
Икъоу емыгупшысэу, сэмэркъэу фэшIэу е еджэныр зэпигъэу шIоигъоу кIэлэцIыкIум ащ фэдэ зекIокIэ пхэндж къыхэфэн ылъэкIыщт.
Ащ фэдэ бзэджэшIагъэ зезыхьагъэм Урысыем и Уголовнэ кодекс ия 207-рэ статья диштэу илъэси 10-м нэсэу хьапс тыралъхьан алъэкIыщт. КIэлэцIыкIум ыныбжь илъэс 14 имыкъугъэ зыхъукIэ, пшъэ­дэкIыжь зэрагъэхьырэр ащ янэ-ятэхэр е илIыкIохэр ары.
ЕтIани къэIогъэн фае гуцаф озыгъэшIырэ Iалъмэкъ е къэ­млан горэ общественнэ чIыпIэм зэрэщылъым, транспортым къызэрэранагъэм фэгъэ­хьыгъэ къэбарыр нэпцIэу алъытэ зэрэмыхъущтыр, ащ щынагъо къыздихьын зэрилъэ­кIыщтыр къыдалъытэзэ, уплъэ­кIунхэр зэрэзэхащэхэрэр.

Урысыем щынэгъон­чъэнымкIэ­ и Федеральнэ ­къулыкъу ­Адыгэ Респуб­ликэмкIэ и ГъэIорышIапIэ ипресс-къулыкъу