Эстраднэ орэдымрэ къашъомрэ якупэу «Шпаргалкэр» зызэхащагъэр илъэс 30 зэрэхъурэр хигъэунэфыкIыгъ. Джырэ искусствэм ихэхъоныгъэкIэ Гупчэу “Шпаргалкэм” ипащ АР-м изаслуженнэ артисткэу Марина Фатеевар.

Адыгеим щызэлъашIэрэ купым имэфэкI епхъулIэу Адыгэ Республикэм и Къэралыгъо филармоние къэгъэлъэгъон щызэхащагъ. ЛIэшIэгъукIэм къыдэхъугъэ къэшъокIо купым зэкIэмкIи нэбгырэ 70-рэ хэхьэ. Орэдэу къаIорэ пэпчъ пIоми
хъунэу лъэпкъ къашъомрэ джырэ хорео­графиемрэ зыхэт композициехэмкIэ къагъэкIэракIэ. «Шпаргалкэм» хэтхэм якъэшъуа­кIэрэ яорэдкъэIуакIэрэ непэрэ мафэм диштэу гъэпсыгъэ, яшъуашэхэр кIэракIэх.
АР-м культурэмкIэ иминистрэу Аулъэ Юрэ пчыхьэзэхахьэр къызэIуихыгъ.
— Непэ зыкъэзыгъэлъэгъорэ купэу «Шпаргалкэм» хэтхэр сэнаущыгъэ хьалэмэт зыхэлъ Адыгеим ижъогъожъыех. АР-м и ЛIышъхьэу КъумпIыл Мурат ыкIи АР-м культурэмкIэ и Министерствэ ацIэкIэ сышъуфэгушIо ыкIи культурэм гъэхъагъэу щишIыгъэхэм апае эстраднэ орэдымрэ къашъомрэ якупэу «Шпаргалкэм» изэхэщакIоу Марина Фатеевам рэзэныгъэ тхылъ фэтэгъэшъуашэ, — къы­Iуагъ Аулъэ Юрэ.
Ащ ыуж Адыгэ Хасэм къафигъэшъо­шэгъэ рэзэныгъэ тхылъхэри купым дэлажьэрэмэ аратыжьыгъ.
ЗимэфэкIхэм къафэгушIуагъэх Мые­къуапэ инароднэ депутатхэм я Совет итхьаматэу Джарымэкъо Азмэтрэ Мые­къопэ администрацием культурэмкIэ и ГъэIорышIапIэ ипащэу Цэй Розэрэ.
— «Шпаргалкэр» музыкальнэ сэнаущыгъэ зиIэ кIэлэцIыкIухэм яунэгъошху. Ар лъэпкъ культурэм игъундж, неущрэ мафэм итыгъэнэбзый. ОрэдыIо-къэшъуакIохэм дэлэжьэрэ Марина Фатеевам лъэшэу тыфэраз. Ны-тыхэм тагъэгупсэфы, — къы­Iуагъ зипшъашъэ илъэсыбэм купым къэ­зыщэрэ Гъыщ Заремэ.
— Илъэс 30 хъугъэу «Шпаргалкэм» лъэшэу сырэгушхо. Купым Iоф дэзышIэрэ цIыфхэм, ны-тыхэу цыхьэ къытфэзышIыхэрэм шъхьащэ инэу афэсэшIы. ТапэкIэ проект гъэшIэгъонхэр щыIэныгъэм щыпхырытщыщтых, — къыIуагъ Марина Фатеевам.
Купым итворчествэ зикIасэхэм къэгъэлъэгъоныр шIухьафтын шъыпкъэ афэхъугъ.
КIэлэцIыкIу музыкальнэ искусствэм хэхъоныгъэ зэришIырэм, творческэ амалхэм зыкъызэраIэтырэм купым иIахьышIу хэлъ. «Шпаргалкэм» тапэкIи гъэхъэгъэшIухэр ышIынхэу фэтэIо. Культурэр лъэпкъхэр зэзыпхыхэрэ кIуачI.
Лъэпшъыкъо
Фатим.