Уайкъокъо Рэмэзан бэшIагъэу шэны фэхъугъ гупшысэ кIапсэр ыгъэщыныр.
Адыгэ унэгъо зэдэIужь щапIугъэ зэш-зэшыпхъуи 4-м ежьыр анахьыжъыгъ, арыщтын, нахьыжъ гущыIэм кIэдэIукIэу, зыфэсакъыжь-зэкIэупкIагъэу къызкIэтэджыгъэри. «ДаIорэр цIыфы мэхъу» аIуагъэба?!
Рэмэзан шэнышIо-цIыфышIу, тхэкIо-­усэкIо IупкIэ хъугъэ. «СыфэкIо цIыфым», — еIо усакIом. Мыр гущыIэ къодыеп, тхакIом идунэееплъыкIэ кIэзыгъэтхъырэу щыт.
«ЦIыфыр цIыфым ищхэпс» пкIэнчъэу аIуагъэп. Тыгу къыдехьыех Хьаткъо Ахьмэд иусэ сатырхэри: «ЦIыфыр щэрэI — щыIэмэ хъяр!» «ЦIыфы» зыцIэр цIыфыным пае къызэрэхъугъэри пытэу ыгу риубытагъ Рэмэзан. ЦIыфхэм уанахь дэгъуни, уанахь лъэшыни зэрэмылъэкIыщтыр ешIэ дэгъоу, къыгурэIо; ощ фэдэ цIыфым уасэ фэпшIэу, зафэу, хьалэлэу уфыщытыным, щыIэныгъэр зэригъэпытэрэр, зэригъэшIурэр иапэрэ усэ тхылъ цIэу фишIыгъэмкIэ — «СыфэкIо цIыфым» — къыгъэшъыпкъагъ.
УщыIэныр къызэрыкIоп, къыхэкIы ащ мэфэ ошъуапщэхэри гур агъэушкъоеу, узэрэмыгугъэгъахэу уишIу урыпщынэжьэуи. Ауми, шIум шIур къызэрэкIакIорэр гъашIэм къеушыхьаты. «МыжъокIэ къыуаорэм къуаекIэ еожь» аIо, ар шъыпкъэ, шIу угу имылъэу, шIу къызэрэбдэмыхъущтыр бэшIагъэу цIыф­лъэпкъым ыгъэунэфыгъ. КIочIэгъу зыфэхъужьырэр, ишIу сыдигъуи IокIэжьы. Ауми, гъогу ин нэфым зэдытетхэу, зэгурыIохэу цIыфхэр рыкIонхэм, цIыф лъэпкъхэр зэдеIэжь-зэкIэдэIукIыжьхэу зэдэпсэунхэм, ти Адыгэ Республикэ ыкIи Урысыешхом ащымамырыным, кIэхъопсы Рэмэзан. Ежь усакIом иI гумэкIи, гулъы­ти, гукIэгъуи, усэкIэ амал дахи, икIас иныдэлъфыбзэ адыгабзэ, илъэпкъ — щыIэныгъэр; кIэхъопсы зэфэдэкIэ чIыгум шIулъэгъур щыбэгъоным, джащыгъум зэпыущтых зэо машIохэр, гу хые минхэм гушIуагъор къарыхьажьыщт, гупшысэ тамэми зиIэтыщт.
Мамырыкъо Нуриет.
Рэмэзан
илирическэ усэхэр
Къуашъом тисэу
Афыпс тыщесы.
Гур ыгъатхъэу
Тыгъэр къепсы.
Огу шхъуантIэр
Къытэхъуапсэ.
УныбжьыкI,
Ппчанэ псыгъо.
Сыгу къыпфэкIо,
Сыпщэгугъы.
ПIупшIэ шэплъхэм
Сыкъяхъуапсэ.
Унэ шIуцIэхэм
Саумэхъы.
Ощ нахь дахэ исэп Россием!
Тхьэр етагъэба узыем!

ТитIо зэдэтшIыгъэ
Iуагъэ
ЗэфытиIэнэу шъыпкъагъэ.
Илъэс пчъагъэм
ДгъэцэкIагъэ.
ТитIу язи
Лъэпэуагъэп.

ЧIым телъи, тети
ЫIэ афещэи
Ахэр иунае хъунхэу.
Уцу имыIэу
Ренэу мэлъыхъо.
Щегъэзые
ЦIыф хыер.
ИIэжьэп ащ
Чэщ чъыер.
ПсынкIэу хъугъэ
Нэй-псые.

Сыпфэежьэп,
Сыгу оIужьрэп —
Пшысэу укъэсыугупшысыгъэшъ.
Чэщыр кIожьи
Нэф къызэшъым,
Къэсыугупшысыгъэр
КIодыжьыгъэ.

Псэкъупсэ лъэмыдж
КIалэхэр къепкIэхых.
Сыкъэрэбгъэ кIай —
Тесэлъхьэ, тесэхы.
Гу тесэшIыхьэшъ, сыкъепкIэхы.
Бэрэ сэбыбы
Жьым сыхэтэу.
Лъакъор псым нэсышъ,
ЫчIэ нэс сехы …
НыбжьыкIэгъум щыщ
А пычыгъо тхъагъор.
НапIэр къефэхы,
Чъыем сыIуехы.