Республикэм игурыт еджапIэхэр къэзыухыгъэхэм ямэфэкI Iофтхьабзэ Мыекъуапэ игупчэу Лениным ыцIэкIэ щытым тыгъуасэ щыкIуагъ.

Республикэм имуниципальнэ образованиехэм ягурыт еджапIэхэр къэзыухыгъэ нэбгырэ мин 1,7-м ехъу, ахэм янэ-ятэхэр ыкIи якIэлэегъаджэхэр мыщ къыщызэрэугъоигъэх. МэфэкIыр зыфызэхащагъэхэм къафэгушIуагъэх АР-м иминистрэхэм я Кабинет и Тхьаматэу КIэрэщэ Анзаур, АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, республикэм ихэбзэ къулыкъу­хэм ялIыкIохэр, муниципалитетхэм япащэхэр.
Гурыт еджапIэхэр къэзыухыгъэхэмрэ ахэм якIэлэегъаджэхэмрэ алырэгъу плъыжьым къызэрэрыкIуагъэхэмкIэ Iоф­тхьабзэр къызэIуахыгъ. Парадым илъэ­хъан муниципалитет пэпчъ икIэлэеджа­кIохэм ягъэхъагъэхэм ягугъу къашIыгъ. ЕтIанэ ахэр янэ-ятэхэм къадэшъуагъэх. Iофтхьабзэр зезыщэхэрэм гурыт еджапIэр къызэраухыгъэм фэгъэхьыгъэ орэдыр къаIонэу, «Адыгэ диско» къа­шIынэу къараIуагъ. МэфэкIым хэлэжьагъэхэр кIэракIэу зэрэфэпэгъагъэхэм, еджапIэхэр къэзыухыгъэхэр зэрэчэфыщтыгъэхэм Iофтхьабзэр нахь къагъэ­кIэрэкIагъ.
Гурыт еджапIэр къызэраухыгъэмкIэ ыкIи ныбжьыкIэхэм я МафэкIэ АР-м и ЛIышъхьэу КъумпIыл Мурат ыцIэкIэ кIэлэеджакIохэм къафэгушIуагъ АР-м и ЛIышъхьэрэ министрэхэм я Кабинетрэ я Администрацие ипащэу Владимир Свеженец ыкIи гъэхъагъэхэр ашIынэу афэлъэIуагъ.
«ЕджапIэхэр къэзыухыгъэхэу лъытэны­гъэ зыфэсшIыхэрэр! Шъо шъуныб­жьыкI, шъукIуачIэ из. ЕджапIэм шъучIэсыфэ шIэныгъабэ зэжъугъэгъотыгъ, IэпыIэгъу шъузэфэхъужьынэу, къинхэм хэкIыпIэ къафэжъугъотынэу зыжъугъэсагъ. Шъуи­щыIэныгъэ ичэзыукIэ шIэхэу ежъугъэ­жьэщт: еджэныр лъыжъугъэкIотэщт, сэнэхьатэу къыхэшъухырэмкIэ Iоф шъу­шIэщт. Къинхэм зыкъяшъумыгъэгъащт, мурадышхохэр шъушIы ыкIи ахэр къызэрэжъудэхъущтым шъуишъыпкъэу шъу­пылъ, шъуицыхьэ зытежъугъэлъыжь, — къыIуагъ Владимир Свеженец.
АР-м гъэсэныгъэмрэ шIэныгъэмрэкIэ и Министерствэ къызэритыгъэмкIэ, блэкIыгъэ илъэс еджэгъум нэбгырэ 1774-мэ еджапIэхэр къаухыгъ. ЕГЭ-м икIэуххэмкIэ нэбгыри 10-мэ балли 100 къахьыгъ: кIэлэеджэкIуи 2-мэ — урысыбзэмкIэ, зы нэбгырэм химиемкIэ, нэбгыри 6-мэ — хьисапымкIэ, зы нэбгырэм — инджылызыбзэмкIэ. Бэмэ ЕГЭ-мкIэ балл 95-м нагъэсыгъ. Гурыт еджапIэхэр къэзыухыгъэхэм олимпиадэ, конференцие зэфэшъхьафхэм, творческэ, спорт зэнэкъокъухэм щатекIуагъэхэр ыкIи призхэр къащызыхьыгъэхэр, музыкальнэ, художественнэ еджапIэхэр къэ­зыухыгъэхэр, ныбжьыкIэ движениехэм чанэу ахэлажьэхэрэр, волонтерхэр, республикэм ишIухьафтын илауреатхэр бэу къахэкIыгъэх.
«Тиреспублики, хэгъэгуми тапэкIэ къарыкIощтыр шъоры бэкIэ зэлъытыгъэ­щтыр. ШъушъхьэкIэ гъэхъагъэу шъушIы­хэрэм, Адыгеимрэ Урысыемрэ ащыпсэурэ лъэпкъхэм яшэн-хабзэхэр зэрэжъу­гъэлъапIэрэм, лъэпкъыбэ зыщызэдэпсэурэ тихэгъэгу икультурэ-тарихъ кIэн бай уасэ зэрэфэшъушIырэм ар нахь лъэш ашIы ыкIи ыпэкIэ лъагъэкIуатэ. ЗэкIэми тызэкъотмэ, тикъэралыгъо тыфэшъыпкъэ­мэ ары ныIэп гумэкIыгъоу къыкъокIы­хэрэр зэкIэ зэпытчын зытлъэ­кIыщтыр», — къыIуагъ Владимир Свеженец еджа­пIэхэр къэзыухыгъэхэм зафигъа­зэзэ.
Iофтхьабзэм гурыт еджапIэхэр къэзыухыгъэхэм якIэлэегъаджэхэмрэ янэ-ятэхэмрэ тхьашъуегъэпсэу щараIуагъ. Купэу «Monte Carlo shov» зыфиIорэм, шооу «TOP BEAT», орэдыIохэу Быщтэкъо Азэмат, Итлъэш Шъэлихьэрэ Ислъамрэ пчыхьэзэхахьэр лъагъэкIотагъ.