Сэкъатныгъэ зиIэхэм ыкIи ветеранхэм яIофыгъохэмкIэ Советэу Адыгэ Республикэм и ЛIышъхьэ дэжь щызэхэщагъэм зичэзыу зэхэсыгъо тыгъуасэ иIагъ. Ар зэрищагъ АР-м иминистрэхэм я Кабинет и Тхьаматэ игуадзэу финансхэмкIэ министрэу Виктор Орловым.

Iофтхьабзэм хэлэжьагъэх АР-м и Къэралыгъо Совет — Хасэм идепутатэу Наталья Широковар, IофшIэнымкIэ ыкIи социальнэ хэхъоныгъэмкIэ министрэу Мырзэ Джанбэч, къулыкъу зэфэшъхьафхэм, сэкъатныгъэ зиIэхэм яобщественнэ организациехэу респуб­ликэм итхэм ялIыкIохэр.
Зэхэсыгъом IофыгъуиплIымэ щахаплъагъэх. Зы­ныбжь хэкIотагъэхэм ящыIэныгъэ изытет нахьышIу шIыгъэным ыкIи медицинэ IэпыIэгъоу арагъэгъотырэм изэхэщэн фэгъэхьыгъэу къэгущыIагъ псауныгъэр къэу­хъумэгъэнымкIэ министрэм игуадзэу Максим Коробко. Уз хьылъэ, мыхъужьын уз зиIэхэм IэпыIэгъу афэхъугъэным, дащ фэдэу медицинэ организациехэм дэкIыгъохэр зэхащэхэзэ ащ фэдэ цIыф купхэм медицинэ IэпыIэгъу зэрарагъэгъотырэм ар игъэкIотыгъэу къатегущыIагъ. Лъэпкъ проектэу «Зыныбжь хэкIотагъэхэр» зыфиIорэм къыдыхэлъытагъэу Iофтхьэбзэ гъэнэфагъэхэр республикэм щырагъэкIокIых. Ащ къы­зэриIуагъэмкIэ, мы илъэсым имэзитф ащ фэдэ сымэджэ хьылъэ нэбгыри 198-мэ яIэзагъэх. Геронтологическэ гупчэм Iоф ешIэ, а лъэныкъомкIэ рагъэджэнхэу врачитIу агъэкIуагъ.
— Зыныбжь хэкIотагъэхэм игъом диспансеризациер ыкIи нэмыкI пэшIорыгъэшъ медицинэ уплъэкIунхэр игъом арагъэкIунхэм тынаIэ тет. Мы илъэсым имэзиплI диспансеризациер зыныбжь хэкIотэгъэ нэбгырэ 22700-м ехъурэм акIугъ. Нэбгырэ 14125-мэ уз гъэтIылъыгъэхэр къахагъэщыгъэх ыкIи нэбгырэ мин 13 фэдизыр учетым хагъэуцуагъ, — хигъэунэфыкIыгъ Максим Коробко.
Зэхэсыгъом сэкъатныгъэ зиIэхэм ящыкIэгъэ Iэзэгъу уцхэр игъом къазэраIэкIэмыхьэрэм иIофыгъо къыщаIэтыгъ. Ар мызэу, мытIоу федеральнэ гупчэми нагъэсыгъ, ау зэхъокIыныгъэ фэхъугъэп. Джыри а Iофым фэгъэзэгъэ лъэныкъо пстэуми яамалхэр зэхэт­хэу еусэнхэу рахъухьагъ.
Урысые Федерацием пенсиехэмкIэ ыкIи социальнэ страхованиемкIэ и Фонд Адыгэ РеспубликэмкIэ и Къутамэ ипащэу МэщлIэкъо Хьамидэ сэкъатныгъэ зиIэхэм техническэ Iэмэ-псымэхэр ащэфынхэм фэшI аратырэ электроннэ сертификатхэм къатегущыIагъ. Электроннэ сертификатыр зэрэгупсэфыр, ащ шIуа­гъэу пылъыр сэкъатныгъэ зиIэхэм игъорыгъозэ къагуры­Iуагъ. Ар бгъэфедэзэ, гущыIэм пае, костыльхэр, тхьакIумэм Iуалъхьэрэ аппаратыр ыкIи нэмыкIэу ящыкIэгъэщтхэр къащэфынхэ алъэкIыщт. Унэм исхэу медицинэ Iэмэ-псымэхэр ыкIи тучанэу къызщащэфыщтыр къыхахынхэ амал яI.
Сэкъатныгъэ зиIэхэм ягумэкIыгъохэр нахьыбэрэм зэрахьылIэу хабзэр общественнэ организациехэр ары. Ахэм ялIыкIохэр зыфэгъэзэгъэ лъэныкъохэм япхы­гъэу щыIэ гумэкIыгъохэр къаIэтыгъэх.
Мыхэм ыкIи нэмыкI Iофыгъоу зыхэплъагъэхэм афэгъэхьыгъэу унашъохэр аштагъэх.

Iэшъынэ Сусан.