Статистикэм къызэригъэлъагъорэм­кIэ, АдыгеимкIэ гъэмафэм имэзэ шъхьаIэу бэдзэогъур анахь мэзэ фабэу щыт. ГущыIэжъым къызэриIоу, «МашIор хэмытэу бэдзэогъу тыгъэм уегъэфабэ».

Гъэмафэм иятIонэрэ мазэ нахь фабэу къызщыхэкIыгъэр 2000-рэ илъэсыр ары, фабэу градус 41-рэ агъэунэфыгъагъ.
ГидрометеорологиемкIэ ыкIи тыкъэзыуцухьэрэ дунаим иуплъэкIункIэ Гупчэм къызэритыгъэмкIэ, бэдзэогъум жьы фабэр ыкIи гъушъэр гурыт Азием къикIыщт. ГурытымкIэ мазэм температурэу щыIэщтыр шапхъэхэм афэдизыщт, ощхэу къещхыщтым ибагъэ шапхъэхэм анахь мэкIэщт. Мазэм къыкIоцI ощх ыкIи ошъу къехыщт.
Апэрэ мэфипшIыр. Чэщым градус 17 — 22-рэ щыIэщт. Мафэм фабэр градус 28 — 33-м, джащ фэдэу градус 38-м кIахьэуи хъущт.
ЯтIонэрэ мэфипшIыр. Чэщым — градус 15 — 20, мафэм фабэр градус 27 — 32-м кIэхьащт.
Ящэнэрэ мэфипшIыр. Чэщым фабэр градус 17 — 22-рэ, мафэм градус 30 — 35-м анэсыщт.
Ощх бэрэ къыземыщхыкIэ, машIо къэхъуным ищынагъо щыIэщт. Псыхъохэм адэт псыр шапхъэу щыIэхэм ашIокIыщтэп. Ау лъэшэу къызещхырэм, ахэм адэт псыр къыдэкIоен ылъэкIыщт.
Мэкъумэщ культурэхэм алъэныкъокIэ ом изытет гумэкIыгъо къыздихьыщтэп.
КIАРЭ Фатим.