Урысые физкультурэ-спорт комплексэу «IофшIэным ыкIи зыкъэухъумэжьыным сафэхьазыр» зыфиIорэм ишъолъыр едзыгъо Джэджэ районым икомандэ текIоныгъэр къыщыдихыгъ.

Гъэсэныгъэм иорганизациехэм ялIыкIохэр ары мыщ хэлэжьагъэ­хэр. Адыгеим имуниципальнэ образовании 6-мэ якIэлэ­е­джа­кIохэм унэе ыкIи команднэ зэнэкъокъухэм защаушэтыгъ. Ахэм метрэ 60, 1500-рэ ыкIи 2000 къачъыгъ, щэрыуагъэх, зэдесыгъэх, нэмыкI спорт лъэпкъхэмкIи яухьазырыныгъэ къагъэлъэгъуагъ.
Ахэр аныбжь елъытыгъэу, илъэс 12 – 13 ыкIи 14 – 15, гощыгъагъэх. Командэ пэпчъ нэбгыри 8 хэтыгъ. Унэе зэнэкъо­къухэм (нахьыкIэхэм якуп) ащытекIуагъэх Мыекъуапэ щыщ Даниил Сосновскэмрэ Джэджэ районыр къэзыгъэлъэгъогъэ Мария Лысенкэмрэ. Нахьыжъхэм якуп апэрэ чIыпIэр къыщыдахыгъ республикэм икъэлэ шъхьаIэ щыщ Арсений Третьяк-Бобровымрэ Ирина Власюковамрэ. Мыекъуапэ щыпсэурэ Камилла Стребковам зы спорт лъэпкъымкIэ очкоуи 100 ригъэкъун ылъэ­кIыгъ. Апэрэ ыкIи ятIонэрэ чIыпIэхэр къыдэзыхыгъэ кIалэхэмрэ пшъа­шъэхэмрэ Адыгеир фестивалым и Урысые едзыгъо къыщагъэ­лъэгъощт. Ар, хабзэ зэрэхъугъэу, бжыхьэм дунэе кIэлэцIыкIу гупчэу «Артекым» щыкIощт. Командэхэм язэнэкъокъу текIоныгъэр къыщыдэзыхыгъэр Джэджэ районыр ары, ащ балл 2778-рэ ригъэкъугъ, Мыекъуапэрэ Красногвардейскэ районымрэ ятIонэрэ ыкIи ящэнэрэ чIыпIэхэр афагъэшъошагъэх.