КъокIыпIэм щыпсэурэ лъэпкъхэм яискусствэкIэ Къэралыгъо музеим икъутамэ лъэпкъ тарихъым фэгъэхьыгъэ Iофтхьабзэ щызэхащагъ. Урысыем исурэтышIхэм я Союз хэтэу, Къэбэртэе-Бэлъкъарым щыщ сурэтышIэу Тхьазэплъыжь Руслъан ихэушъхьафыкIыгъэ къэгъэлъэгъон къыщызэIуахыгъ. Ар Нарт эпосым фэгъэхьыгъ.

Зэхахьэр къызэIуихыгъ музеим икъу­тамэ ипащэу ШъэуапцIэкъо Аминэт. Тхыдэжъхэм афэгъэхьыгъэ IофшIэнхэм сурэтышIыр чанэу зэрадэлажьэрэр ащ хигъэунэфыкIыгъ. Тарихъым лъапсэу иIэр тщыгъупшэ зэрэмыхъущтым къытегущыIагъ, зэгъэпшэнхэр ышIыгъэх.
ЗэхэщакIохэм пшъэрылъ шъхьаIэу яIэр лъэпкъ шIэжьым, лъэпкъ тарихъым ямэхьанэ къэIэтыгъэныр ары.
— Тятэжъ пIашъэхэм ятарихъ тищыIэныгъэ хэтыным тыфэзыщэрэ къэгъэлъэгъон Тхьазэплъыжь Руслъан къы­гъэхьазырыгъ. ЩыIэныгъэм, шIэжьым къапкъырыкIырэ сурэтхэр, пкъыгъохэр непэ тинэрылъэгъух, — къыIуагъ АР-м культурэмкIэ и Министерствэ иотдел ипащэу Шэуджэн Бэлэ.
Нарт эпосыр къыткIэхъухьэрэ лIэужхэм ягъэшIэгъэныр, ащ шъхьэкIафэ фашIыныр, яхэгъэгу шIу алъэгъуным фэщэгъэн­хэр ары зэхэщакIом пшъэрылъ шъхьаIэу зыфигъэуцужьыгъэр.
— Лъэпкъ тхыдэр сурэткIэ, пкъыгъо зэфэшъхьафкIэ къизгъэлъэгъукIыныр сипшъэрылъыгъ. Хэтрэ цIыф лъэпкъи икультурэ, идунэезэхашIэ зэхъокIыныгъэхэр фэхъухэзэ щыIэныгъэ гъогум къырэкIо. Ащ къыхэкIыкIэ Нарт эпосымрэ ижъырэ дунэе мифологиемрэ ахэлъ нэшэнабэ зэтефэ. ТиныбжьыкIэхэм шъолъырым итарихъ ашIэн фае, — къы­Iуагъ сурэтышIэу Тхьазэплъыжь Руслъан.
Адыгэ лъэпкъым итарихъ къыхэхыгъэ пкъыгъо 60 къэгъэлъэгъоным хэхьагъ. Ахэр пхъэм, джэрзым, гъуаплъэм ахэшIыкIыгъэх.

Нарт эпосым къыхэхыгъэ геройхэу: Саусырыкъо, Ащэмэз, Пэтэрэз, Сэтэнэе гуащэр, Лъэпшъ гъукIэ Iазэм афэгъэхьыгъэхэр къагъэлъэгъуагъ.
— Нарт эпосыр къыткIэхъухьэрэ лIэужхэм ягъэшIэгъэныр, ащ шъхьэкIафэ фашIыныр, яхэгъэгу шIу алъэгъуным фэщэгъэнхэр пкъыгъохэр къыфэджэх. Сурэтым ижабзэкIэ къэгъэлъэгъогъэ тхыдэр лIэшIэгъухэм къахэнэщт, — хигъэунэфыкIыгъ Урысыем культурэмкIэ изаслуженнэ IофышIэу, Адыгеим ыкIи Къэрэщэе-Черкесым язаслуженнэ сурэтышIэу Бырсыр Абдулахь.
Къэбэртэе-Бэлъкъарым къикIыгъэ хьакIэхэу Урысыем исурэтышIхэм я Союз икъутамэу КъБР-м щыIэм итхьаматэу Къаныкъо Жаннэрэ мы организацием хэтэу Юлия Зеленскаямрэ зэхахьэм хэлэжьагъэх.
Нарт эпосым пхырыщыгъэх адыгэ философиер, гупшысакIэр, шэн-хабзэхэр. А пстэуми уасэ афэтшIын фае.
Лъэпшъыкъо Фатим.
Сурэтххэр авторым иех.