Гъэстыныпхъэ шхъуантIэр зимыIэхэм ар аIэкIэгъэхьэгъэным фытегъэпсыхьэгъэ программэр, «догазификация» нахь зэрэтшIэрэр, УФ-м и Президентэу Владимир Путиным иунашъокIэ атIупщыгъ.

Газыр зыщызэбгырыщыгъэ псэупIэхэм адэсхэу ар зимыIэхэм ящагу гъунапкъэ­хэм ыпкIэ хэмылъэу афещэлIэгъэным ар фэгъэхьыгъ. Мылъкоу ащ пэIухьэрэр УФ-м и Правительствэ, шъолъыр хэбзэ къулыкъухэм ыкIи «Газпромым» апшъэ дэкIы. Гъэстыныпхъэ шхъуантIэр щагу гъунэм ыпкIэ хэмылъэу зынагъэсыкIэ, ащ лъыпыдзагъэу лъагъэкIотэным, унэм ращэлIэным ыкIи ащ щызэбгыращыным ищыкIэгъэ пстэур, ахъщэри тхылъхэри, псэупIэр зием ипшъэрылъых.
Программэр затIупщым ащ сад ыкIи дачэ мысатыу товариществэхэр къыхиубытэщтыгъэхэп. УФ-м и Президентэу Владимир Путиным ахэри хэгъэхьэгъэн­хэм кIэщакIо фэхъугъэу, мэзэе мазэм Федеральнэ ЗэIукIэм фигъэхьыгъэ Джэпсалъэм къыщыхигъэщыгъ. Ащ ыуж охътабэ темышIэу унашъор УФ-м и Правительствэ ыштагъ.
Мыщ фэдэ товариществэу газыр зыщызэбгырыщыгъэм унэ е чIыгу Iахь щызиIэм ар зэриунаер къыушыхьатыжьмэ, игъунапкъэ ыпкIэ хэмылъэу фыращэлIэнэу фитыныгъэ иIэ мэхъу. Ащ пае лъэIу тхылъыр унэр зием е товариществэм итхьаматэ атын алъэкIыщт.
«Догазификацием» фэгъэхьыгъэ программэм хэлажьэмэ зышIоигъом псэупIэу зыдэсым газыр зэрэщызэбгырыщыгъэн фаем имызакъоу, унэр зэриунаер къыушыхьатышъун фае. ЛъэIу тхылъыр гъэстыныпхъэ шхъуантIэр цIыфхэм аIэкIэгъэхьэгъэным фэгъэзэгъэ компанием о пшъэхьэкIэ епхылIэми хъущт, къэралыгъо фэIо-фашIэхэм япортал бгъэфедэзэ, онлайн шIыкIэм тетэу птыни плъэкIыщт.
«Догазификацием» фэгъэхьыгъэ программэм пIэлъэ гъэнэфагъэ иIэп. Ар къызщиIорэ унашъор УФ-м и Правительствэ 2022-рэ илъэсым къыдигъэкIыгъ. Мы программэм унэе псэупIэхэм ямызакъоу, социальнэ псэуалъэхэри, гущыIэм пае, кIэлэцIыкIу IыгъыпIэхэр, еджапIэхэр, медицинэм епхыгъэ учреждениехэр, нэмыкIхэр къыхеубытэх.
2021-рэ илъэсым ибэдзэогъу мазэ программэм ипхырыщын Адыгеим щырагъэжьагъ. «Газпром межрегионгаз Майкоп» зыфиIорэм ипресс-къулыкъу тызэрэщигъэгъозагъэмкIэ, а уахътэм гъэстыныпхъэ шхъуантIэр зимыIэу, ар ищагу ращэлIэным пае лъэIу тхылъ къэзытыгъэр нэбгырэ мин 12,4-рэ мэхъу. Ахэм ащыщэу мини 10-м ехъумэ компаниер зэзэгъыныгъэм адыкIэтхагъ, мини 9 фэдизмэ ар афагъэцакIи, ягъунапкъэ­хэм афыращэлIагъ, унэм рищагъэу зыгъэфедэрэр мини 3,2-рэ мэхъу.
Гъэстыныпхъэ шхъуантIэр анахьыбэу цIыфхэм аIэкIэзгъэхьэрэ шъолъырхэм Адыгеир ащыщ. Непэ республикэм исым ипроцент 95-мэ ар яI. АщкIэ зишIуагъэ къэкIуагъэр Публичнэ Iахьзэхэлъ обществэу «Газпром» зыфиIорэм ипрограммэу гъэстыныпхъэ шхъуантIэр цIыфхэм аIэкIэгъэхьэгъэным фэгъэхьыгъэм 2002-рэ илъэсым къыщыублагъэу зэрэхэла­жьэрэр ары. ГущыIэм пае, ащ къыщегъэжьагъэу 2022-рэ илъэсым нэс пштэмэ, сомэ миллиардрэ миллион 600-м ехъурэ инвестициеу «Газпромым» республикэм къыхилъхьагъ. АщкIэ псэупIэхэр зэзыпхыхэрэр газрыкIуапIэу 22-рэ ашIыгъ, ар километрэ 219,3-рэ мэхъу, унэ 5905-мэ гъэстыныпхъэ шъхъуантIэр аIэкIэгъэ­хьэгъэным пае котельнэ 38-рэ агъэу­цугъ.
Адыгеим гъэстыныпхъэ шхъуантIэр щызэбгырыщыгъэным фэгъэхьыгъэ хэушъхьафыкIыгъэ программэу 2005 — 2020-рэ илъэсхэм ателъытэгъагъэм къыдыхэлъытагъэуи сомэ миллиардрэ миллион 300-м ехъурэ инвестициеу компанием республикэм къыхилъхьагъ. АщкIи псэупIэхэр зэзыпхыхэрэр газрыкIуапIэу 21-рэ ашIыгъ, ар километрэ 204-рэ мэхъу.
2020-рэ илъэсым ичъэпыогъу мазэ «Газпромым» ипащэу Алексей Миллеррэ АР-м и ЛIышъхьэу КъумпIыл Муратрэ 2021 — 2025-рэ илъэсхэм ателъытэгъэ зэзэгъыныгъакIэм зэдыкIэтхагъэх. Рес­публикэм газ зимыIэу исхэм аIэкIэгъэ­хьэгъэным джыри сомэ миллиони 3,1-рэ компанием пэIуигъэхьанэу ащ къыдэ­лъытагъ. «Газпромым» гъэстыныпхъэ шхъуантIэм икIуапIэхэр псэупIэу зынэмысыхэрэм арещалIэ. Мыекъопэ, Тэхъу­тэмыкъое, Джэджэ, Красногвардейскэ, Шэуджэн ыкIи Теуцожь районхэм япсэупIэхэу 19 ащ къыхеубытэ. Джащ фэдэу социальнэ мэхьанэ зиIэ псэуалъэхэм, индустриальнэ паркхэм газыр зэбгырызытIупщырэ станциехэр, зэрыкIощтхэр ащегъэпсых.
ХЪУТ Нэфсэт.
Сурэтыр: «Адыгэ макъэм» ихъарзынэщ.