IофшIэнхэм япроцент 45-р агъэцэкIагъ
Шъолъыр лъэмыджхэм ягъэцэкIэжьын лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм къыдилъытэрэ пшъэрылъхэм зэу ащыщ.
Хэтрэ шъолъыркIи лъэмыджхэр анахь зэшIомыхыгъэ Iофыгъохэм ащыщых. Мы проектым ишIуагъэкIэ аужырэ илъэситIум шъолъыр гъогухэм къахиубытэрэ лъэмыджи 6-у метрэ 280-рэ зикIыхьагъэр федеральнэ шапхъэхэм адиштэу Адыгеим щызэтырагъэпсыхьажьыгъэх. 2024-рэ илъэсым Кощхьэблэ районымкIэ псыхъоу Фэдз телъ лъэмыджым (метрэ 219-рэ хъурэм) гъэцэкIэжьын IофшIэнхэр рашIылIэх.
Автомобиль гъогухэмкIэ ГъэIорышIапIэу «Адыгеяавтодорым» къызэритыгъэмкIэ, подрядчикым IофшIэнхэм япроцент 45-р ыгъэцэкIэгъах.
Фирмэу «Ростовавтомост» зыфиIорэм лъэмыджым изыбгъу иаужырэ бгыкъухэр зэблихъугъэх, ригельхэмрэ лъэмыджым икIэгъэкъонхэмрэ гъэцэкIэжьын IофшIэнхэр арешIылIэх. ЛъэмыджышIхэмкIэ федэу щытыгъ мэкъуогъум дунаир зэрэфэбагъэр ыкIи псыхъом псэу дэтым къызэрэкIичыгъэр.
Шъугу къэтэгъэкIыжьы гъэцэкIэжьын IофшIэнхэм сомэ миллион 300-м ехъу зэрапэIухьащтыр, зэзэгъыныгъэм диштэу мы илъэсыр имыкIызэ ахэр зэраухын фаер. Дунаим изытет зэщымыкъомэ, бжыхьэм ыгузэгу ехъулIэу лъэмыджым игъэцэкIэжьын аухын алъэкIыщт.
Лъэмыджэу агъэцэкIэжьырэм къекIуалIэхэ зыхъукIэ водительхэм ясакъыныгъэ нахь агъэлъэшын фае. Гъогум шъолъыритIу — Адыгэ Республикэмрэ Краснодар краимрэ зэрэзэрипхырэм къыхэкIэу лъэмыджыр зэпырамыгъэIыкIынэу, шъолъыр-шъолъырэу ащ гъэцэкIэжьынхэр рашIылIэнэу рахъухьагъ. Къэралыгъо автоинспекцием ишъолъыр гъэIорышIапIэхэм унашъо зэрашIыгъэм тетэу лъэмыджым нэфырыгъуазэ тырагъэуцуагъ.