ЗыкI къэралыгъо ушэтынхэм ялъэ­хъан шъхьаIэкIэ зэфэхьысыжьхэр къэнэфа­гъэх. Ахэм къызэрагъэлъэгъуагъэмкIэ, респуб­ликэм иныбжьыкIэ нэбгырипшIымэ балли 100 предмет зэфэшъхьафхэмкIэ къахьыгъ.
УрысыбзэмкIэ къэгъэлъэгъунышIухэр ашIыгъэх Элеонора Тупикинамрэ (гурыт еджапIэу N 17, Мыекъуапэ) Елизавета Логиновамрэ (я 22-рэ гимназиер, Мые­къуапэ).
Профильнэ хьисапымкIэ нэбгырихмэ балли 100 къахьыгъ. Ахэр: Артур Абдуллиныр (гурыт еджапIэу N 17, Мые­къуапэ), Павел Облогиныр (я 19-рэ лицеир, Мыекъуапэ), ГъукIэлI Айдэмыр (я 34-рэ лицеир, Мыекъуапэ) ыкIи Мые­къуапэ ия 22-рэ гимназие иеджакIохэу Кира Коровкинар, Къэлэшъэо Астемыр ыкIи НатIэкъо Мадин.
Химиер дэгъу дэдэу ытыгъ Олег Обоз­­нэм (я 19-рэ лицеир, Мыекъуапэ).
ИнджылызыбзэмкIэ балли 100 къы­хьыгъ Дзыбэ Дайанэ (гурыт еджапIэу N 9, Мыекъуапэ).
АР-м иаттестационнэ къулыкъу къызэритырэмкIэ, IэпэчIэгъэнэ мафэхэм атыжьыгъэхэм язэфэхьысыжьхэм джыри яжэх. Ахэм япIалъэр бэдзэогъум и 1-м къыщежьэ. Ау предмет шъхьаIэхэу урысыбзэмрэ хьисапымрэкIэ пчъагъэхэр непэ, пчыхьэм нэс къэнэфэнхэу ежэх, сыда пIомэ, арынчъэу еджапIэр къызэраухыгъэмкIэ аттестатыр аратыжьын алъэкIыщтэп(непэ ахэр аратыжьынхэу щыт). ХьисапымкIэ «2» къэзыхьыгъэ нэбгыри 130-мэ ар кIатхыкIыжьыгъ, урысыбзэм итыгъо ушъхьагъу зэфэшъхьафхэм апкъ къикIэу къемыкIолъэшъу­гъэхэм джащ фэдэу атхыжьыгъ.
Шъугу къэдгъэкIыжьын, республикэмкIэ я 11-рэ классыр къэзыухыгъэхэм япчыхьэзэхэхьэ ин Адыгеим икъэлэ шъхьаIэ игупчэу Лениным ыцIэ зыхьырэм пчыхьашъхьэ щыкIощт. Нэбгырэ 1860-мэ еджапIэр къызэраухыгъэр мэфэкIышхокIэ хагъэунэфыкIыщт.
Анцокъо Ирин.

Сурэтхэр: унэе хъарзынэщхэр.