Джэджэ районым игупчэ модельнэ тхылъеджапIэ патриотическэ сыхьатэу «Къэралыгъоу тызщыпсэурэр музеим итарихъ зэрэхэтыр» зыфиIорэр щыкIуагъ.

Урысыем иджырэ тарихъ и Къэралыгъо гупчэ музей загъэпсыгъэр илъэси 100 зэрэхъурэм Iофтхьабзэр фэгъэхьыгъагъ. Ащ къыдыхэлъытагъэу Iофтхьабзэм хэлэжьагъэхэр «Музеим итарихъ — къэралыгъом итарихъ» зыфиIорэ видео техыгъэм рагъэплъыгъэх. Джырэ технологиякIэхэм яамалкIэ пэIудзыгъэ шIыкIэм тетэу ахэм музеим экскурсие щыряIагъ, Урысыем иджырэ тарихъ и Къэралыгъо гупчэ музей щыкIорэ къэгъэлъэгъонхэм яплъыгъэх. Ащ фэшъхьафэу зыщыпсэухэрэ къэралыгъом итарихъ зэрашIэрэр джэгукIэу «Къэралыгъом итарихъ» зыфиIорэмкIэ къырагъэлъэгъукIыгъ.
Патриотическэ сыхьатым кIэлэцIыкIухэри нахьыжъхэри хэлэжьагъэх. Iоф­тхьабзэм ыкIэм лIэужым ишIэжь мэхьанэу иIэм, хэушъхьафыкIыгъэ дзэ операцием хэлажьэхэрэм ялIыхъужъныгъэ атегущыIагъэх. Ятарихъ, якультурэ ашIэу, шIэжьыр агъэлъапIэу, яхэгъэгу шIу алъэгъоу къыткIэхъухьэхэрэр пIугъэнхэм мэхьанэ ин зэриIэр анахь шъхьаIэу къыхагъэщыгъ.
Анцокъо Ирин.
Сурэтыр: Джэджэ районым игупчэ модельнэ тхылъеджапI.