ХэушъхьафыкIыгъэ дзэ операцием хэлэжьагъэхэм ыкIи ахэм яунагъохэм апае IофшIэпIэ чIыпIэхэм яермэлыкъ культурэм и Унэу «Гигантым» ащыфызэхащагъ. Фондэу «Хэгъэгум иухъумакIохэр» зыфиIорэм ишъолъыр къутамэ ащ кIэщакIо фэхъугъ.

Предприятие 14-мэ ялIыкIохэр Iофтхьабзэм хэлэжьагъэх: щэ комбинатэу «Майкопский», «Картонтара» зыфиIохэрэр, цIыфхэм ясо­циальнэ фэIо-фашIэхэр афэзы­гъэцэкIэрэ Зэхэубытэгъэ гупчэу Мые­къуапэ щыIэр, Мыекъопэ къэ­ралыгъо технологическэ универ­ситетыр, университетэу «Синергия». Iофтхьабзэм хэлажьэхэрэр IофшIапIэм зэрэIухьащтхэм, пIэлъэ гъэнэфагъэкIэ лэжьэнхэм, сэнэхьат ыкIи гъэсэныгъэ тедзэ зэрагъэгъо­тыным яIофыгъохэм специалистхэр къатегущыIагъэх.
— Ермэлыкъым икъэбар къысэзыIуагъэр фондэу «Хэгъэгум иухъу­макIохэр» зыфиIорэм исоциальнэ координатор ары. IофшIэпIэ тедзэ мы уахътэм сищыкIэгъэ дэд. Iоф­шIэн языгъэгъотырэ нэбгырэ зау­лэмэ непэ зафэзгъэзагъ, къысфытеонхэм сежэщт, — къыIуагъ хэ­кIо­дэгъэ зэолIым янэу Валентинэ.
— ЛэжьэпкIэ дэгъу зыпылъ Iоф­шIапIэ сиIэным, неущрэ мафэм сицыхьэ телъыным сэркIэ мэхьанэ иI. КъысэкIущт IофшIэн къыщызгъо­тынэу ермэлыкъым сыкъэкIуагъ, — къеIуатэ хэушъхьафыкIыгъэ дзэ операцием иветеранэу Игорь.
Мы уахътэ ехъулIэу хэушъхьафы­кIыгъэ дзэ операцием иветерани 9-мэ IофшIэн зэрагъэгъотынымкIэ шъолъыр фондыр IэпыIэгъу афэ­хъугъ.
— Ермэлыкъым ишIуагъэкIэ ве­теранхэр гъэсэныгъэм иучреждениехэм ялIыкIохэм, IофшIэн языгъэгъотыхэрэм аIукIэнхэшъ, амалэу щыIэхэм акIэупчIэнхэ алъэкIы. Дзэ операцием илIыхъужъхэм янахьыбэм аныбжьыкIэ Iоф ашIэн алъэ­кIыщт ыкIи яунагъохэм ящыкIа­гъэр арагъэгъотынэу ахэр фаех, — хигъэунэфыкIыгъ шъолъыр фондым ипащэу ПIатIыкъо Аслъан.
Мы IофшIэныр лъагъэ­кIотэщт. Ермэлыкъым къекIолIэн зымылъэ­кIыгъэхэр фондэу «Хэгъэ­гум иухъу­макIохэр» зыфиIорэм ишъо­лъыр къутамэ иIофышIэ мафэ къэс сыхьатыр 11-м къыщегъэжьагъэу 13-м нэс зыфагъэзэн алъэ­кIыщт (ур. Пролетарскэр, 353).
Iэшъынэ Сусан.