Гъэтхэ дзэ дэщыгъом къыдыхэлъытагъэу, Урысыем и УIэшыгъэ КIуачIэхэм къулыкъур ащызыхьыщт ныбжьыкIэхэм язичэзыу куп мэкъуогъум и 26-м гъогу техьагъ.

КъулыкъушIэ нэбгыри 10-р мэфэкI шIыкIэм тетэу агъэкIотагъэх. Ахэм ошъогу-десантнэ дзэхэм къулыкъур аща­хьыщт.
МэфэкI Iофтхьабзэу АР-м идзэ комис­сариат щыкIуагъэм хэлэжьагъэх хэушъхьафыкIыгъэ программэхэмкIэ АР-м и ЛIышъхьэ и ГъэIорышIапIэ ипащэу Вла­димир Шабалиныр, Къыблэ дзэ округым изэхэт стратегическэ командование иинспектор куп хэтэу, генерал-майорэу Александр Дорофеевыр, АР-м идзэ комиссар иIэпыIэгъоу Одэжьдэкъо Руслъан, Мыекъопэ къэлэ администрацием ипащэ игуадзэу, ветеранхэм якъэлэ Совет итхьаматэу Юрий Томчак, патриотическэ ыкIи общественнэ организациехэм ялIыкIохэр, дзэ къулыкъум иветеранхэр, ны-тыхэр.
Iофтхьабзэр къызэIуихыгъ ыкIи зэрищагъ Одэжьдэкъо Руслъан. Республикэм идзэ комиссар ыцIэкIэ шIуфэс къари­хыгъ ыкIи зыныбжь икъугъэ кIэлэ ныбжьыкIэхэу гъогу техьэхэрэр щытхъу хэлъэу къулыкъу пIалъэр къахьынышъ, къагъэзэ­жьынэу зэращыгугъыхэрэр къыхигъэ­щыгъ.
— Мэзэ 12-у шъукъызэрэтыщтыр псынкIэу кIощт. Ошъогу-десантнэ дзэхэм къулыкъу ащыхьыгъэным лIыгъэ, пытагъэ ыкIи гу лъэшыгъэ ищыкIагъэх. ЛъэгэпIэшIухэм адиштэрэ дзэхэм ащыщ къулыкъур щы­шъухьынэу шъуинасып къызэрихьыгъэм шъурыгушхонэу щыт. Къэралыгъор къэухъумэ­гъэныр – пшъэрылъ шъхьэIэу шъуиI, ар щытхъу хэлъэу жъу­гъэцэкIэнышъ, узынчъэу къэжъу­гъэзэжьынэу сышъуфэлъаIо, — хигъэунэфыкIыгъ дзэ комиссарым иIэпыIэгъу.
Къыблэ дзэ округым изэхэт стратегическэ командование иинспектор куп хэтхэу Александр Дорофеевым ныбжьыкIэхэм закъыфигъэзагъ. Хэгъэгум ыпа­шъхьэ пшъэдэкIыжьэу щахьырэр агъэцэкIэным игъо къызэрэсыгъэр ащ хи­гъэ­унэфыкIыгъ. Хъулъфыгъэм ишэн-зе­кIуакIэхэр дзэ къулыкъум псыхьагъэ зэрэщыхъухэрэр, мы мафэм къыщегъэ­жьагъэу ахэр зэрэдзэкIолIхэр къагурыIозэ, щытхъу хэлъэу япшъэрылъхэр зэшIуахынхэу зэрэщытыр агуригъэIуагъ. Якомандирхэм ядэIунхэу, зыфэсакъы­жьынхэу, зэрэдэкIыгъэхэм фэдэу япсауныгъэ зэщымыкъоу ны-тыхэм къафагъэзэжьынхэу къариIуагъ.
ГущыIэр лъигъэкIотагъ Юрий Томчак. Дзэм къулыкъу щызыхьынэу ежьэгъэ кIэлакIэхэм ашIыгъэ лъэбэкъур щытхъу­гъэу афэплъэгъунэу зэрэщытыр ащ къыхигъэщыгъ.
— Дзэ къулыкъум зыщышъумы­дзыеу, зышъумыгъэбылъэу шъуихэгъэгу къэшъуухъумэнэу къызэрэхэшъухыгъэр тэрэз. Ар хэтрэ хъулъфыгъи ипшъэрылъ. Тикъэралыгъо игъунапкъэхэм ащыщхэм зэпэуцужьхэр зэращыкIохэрэм пстэуми тыщыгъуаз, ау а плъыр-стыр чIыпIэхэм шъо шъуащэщтэп. Илъэсыр кIоу, дзэ техникэр, Iашэр зэрэбгъэфедэщтхэр икъоу къызIэкIэжъугъа­хьэхэу, шъо игъоу шъулъытэмэ, зэзэгъыныгъэкIэ къулыкъур къы­хэшъухын шъулъэкIыщт. Непэ къышъуфэгумэкIыхэрэ ны-тыхэр зыщышъумыгъэгъупшэх, зэпхыныгъэ адэшъуIыгъ, — къы­Iуагъ Ю. Томчак.
Ны-тыхэм ацIэкIэ къэзэрэугъоигъэхэм закъыфигъэзагъ Мыекъуапэ щыпсэурэ Валентина Блудовам.
— Ныхэм тыгу зэхахьэ, ау ащ дакIоу, тикIалэхэм тарэгушхо. Гъэхъагъэхэр шъушIыхэзэ къулыкъур щытхъу хэлъэу шъу­хьынэу, шъуныбжьыкIи, шъуитеплъэкIи псыхьагъэ шъухъу­гъэу, шъуипсауныгъэ дэгъоу къэ­жъугъэзэжьынэу сышъуфэ­лъаIо, — къыIуагъ ащ.
Валентинэ икIалэу Антип колледжыр къызэриухэу ыныбжьыкIэ къытефэрэ дзэ къулыкъум кIонэу рихъухьагъ. Ар къыухэу къызигъэзэжьыкIэ, еджэным пидзэжьын гухэлъ зыдиIыгъ. ЩыIэны­гъэм IофшIэпIэ чIыпIэ дэгъу щыбгъотынымкIэ дзэм къулыкъу щыпхьыным мэхьанэ зэриIэр къыхигъэщыгъ.
— Гъэсэпэтхыдэ гущыIэхэу нахьыжъхэм къытаIуагъэхэр къызэрэтшъхьапэщтхэм сицыхьэ телъ. Щытхъу хэлъэу къулыкъур зэрэтхьыщтымкIэ, къызэрэтщыгугъыхэрэр къызэрэд­гъэшъыпкъэжьыщтымкIэ гущыIэ къэтэты, — еIо кIэлэ ныбжьыкIэм.
Ошъогу-десантнэ дзэ частэу ныбжьыкIэхэр зыдащэщтхэм илIыкIоу, майорэу Александр Нургалиевыр къэгущыIагъ. Ащ къызэриIотагъэмкIэ, къулыкъушIэхэр апэ егъэджэн гупчэу къалэу Омскэ дэтым мэзитIо щыIэщтых, нэужым дзэ частьхэм атырагощэщтых. Джащ фэдэу егъэджэн гупчэм тарихъ гъогоу къыкIугъэр къэзэрэугъоигъэхэм къафиIотагъ.
Iофтхьабзэм икIэухым муниципальнэ образованиехэм япащэхэм ацIэкIэ дзэкъулыкъушIэхэм къафагъэхьазырыгъэ шIухьафтынхэр аратыгъэх. Нэужым концерт программэм еплъыгъэх. Ащ ыуж къэзэрэугъоигъэхэр щагум дэзэрэщагъэх, ныбжьыкIэу гъогу техьагъэхэр агъэкIотагъэх.
Iэшъынэ Сусан.
Сурэтыр: Артур Лаутеншлегер.