Адыгеим и Джэджэ район ипсэупIэу Келермесскэм екIурэ автомобиль гъогум изы Iахь игъэцэкIэжьын макIо.

Лъэпкъ проектэу «ШэпхъэшIухэм адиштэрэ гъогу щынэгъончъэхэр» зыфи­Iорэм къыдыхэлъытагъэу мы мазэм ыкIэм ехъулIэу зичэзыу гъэцэкIэжьын IофшIэнхэр аухынхэу ары. Федеральнэ шапхъэ­хэм къапкъырыкIыхэзэ ащ асфальт тыралъхьэ.
Подряднэ организациеу Шэуджэн ДРСУ-м итехникэ гъэнэфагъэрэ игъогушIхэмрэ гъогум изы Iахьэу километрэ 1,7-рэ хъурэм гъэцэкIэжьын IофшIэнхэр щаухых. ПстэумкIи сомэ миллион 38-рэ зыте­фэщт IофшIэнхэмкIэ зэзэгъыныгъэу зэдашIыгъагъэм къыпкъырыкIыхэзэ япшъэрылъхэр агъэцакIэх.
Мы организацием асфальт-бетонышI завод зэриIэм ишIуагъэкIэ гъогушIхэм зэзэгъыныгъэм къыдилъытэрэ лъэныкъохэр дэгъоу агъэцэкIэнхэм иамал аIэкIэлъ. Гъогубгъум епхыгъэ IофшIэнхэри макIох, мыжъо- пшэхъо зэхэлъ тыралъхьэ. Ащ нэужым тамыгъакIэхэр гъогум тырагъэуцощтых ыкIи агъэтхъыщт.

Зэзэгъыныгъэм къызэрэдилъы­тэрэм тетэу Iоныгъом иублэгъум шIомыкIэу IофшIэнхэр аухынхэу ары, ау Iофхэр псынкIэу зэрэлъыкIуатэхэрэм укъыпкъы­рыкIын хъумэ, мы мазэм ыкIэхэм адэжь автомобиль гъогум изы Iахьэу зигугъу къэтшIыгъэр зэрэпсаоу агъэцэкIэжьыщт. Мы псэупIэм иурамэу Советскэм, гъэцэкIэжьынхэр зыщыкIорэм, фельдшер-мамыку IэзапIэр, еджапIэу N 8-р, культурэм и Унэ, тучан заулэ тет. Федеральнэ лъэпкъ проектым къызэрэдилъытэрэм тетэу социальнэ мэхьанэшхо зиIэ мыщ фэдэ псэуалъэхэм ягъэцэкIэжьынкIэ шэпхъэ гъэнэфагъэхэм къапкъырэкIых. Гъогухэм ягъэцэкIэжьын зэрэкIорэм лъэшэу ынаIэ тырегъэты автомобиль гъогухэмкIэ ГъэIорышIапIэу «Адыгеяавтодор» зыфиIорэм.