Мэфэ заулэ хъугъэу емынэ узыр (холерэр) къызыхэкIырэ «палочкэр» зашъохэрэ псым къыхэхьан ылъэкIынэу зэрытхэгъэ къэбарыр социальнэ хъытыухэм къащекIокIы.

Ащ епхыгъэу цIыфхэри гумэкIыгъо хэфагъэх. Къэбарым ишъыпкъапIэ зэдгъэшIэнэу щэфакIохэм яфитыныгъэхэр ыкIи цIыфым игупсэфыныгъэ къэухъу­мэгъэнхэмкIэ Федеральнэ къулыкъум и ГъэIорышIапIэу Адыгэ Республикэм щыIэм зыфэдгъэзагъ.
Роспотребнадзорым иотдел ипащэу Гурген Авакян къызэриIуагъэмкIэ, ар къэбар нэпцI ыкIи гумэкIыгъо щыIэнэу щытэп.
— Дезинфектантэу агъэфедэхэрэм емынэр къызыхэкIырэр апэуцун ылъэкIырэп, нэмыкIэу къэпIон хъумэ, псырыкIуапIэхэм арыт псыр дезинфекцие зэрашIырэм ишIуагъэкIэ, а «палочкэр» псаоу къэнэн ылъэкIыщтэп. Джащ фэд, зашъохэрэ псым имызакъоу, тыкъэзыуцухьэрэ дунаим иобъектхэм мы узыр къыхэзыгъэщырэ уплъэкIунхэр тхьамафэм зэ тэшIых. ПсыубытыпIэхэми, псы уцуагъэхэми уплъэкIунхэр ахэтэхых. Ащ дакIоу, сымэджэ хьылъэхэу а узыр зиIэн ылъэ­кIынэу зэгуцафэхэрэм, республикэм щымыщэу къи­хьэрэ цIыфхэм уплъэкIунхэр адызетэхьэх, — хигъэунэфыкIыгъ Гурген Авакян.
ТигущыIэгъу къызэрэхигъэщыгъэмкIэ, илъэс пчъа­гъэ хъугъэ емынэ узыр тишъолъыр зыщамыгъэунэфыгъэр. Ащ зыкъимыIэтынымкIэ зэпымыоу ищыкIэгъэ пэшIорыгъэшъ Iофтхьабзэхэр тхьамафэ къэс зэрахьэх, гумэкIыгъо щыIэп. Роспотребнадзорым иIофышIэхэм цIыфхэм зафагъазэ къэбар нэпцIэу социальнэ хъытыухэм къащекIокIыхэрэм ямыдэIунхэу, официальнэ сайтхэм къарыхьэхэрэм алъыплъэн­хэу.
Iэшъынэ Сусан.