Урысыем и Почтэ сэнэхьат ­IэпэIэсэныгъэмкIэ зэнэкъокъу къалэу Ростов-на-Дону щызэхищагъ. Ащ хэлэжьагъэх Волгоградскэ, Воронежскэ, Тамбовскэ, Липецкэ, Ростовскэ хэку­хэм, Адыгэ Республикэм ыкIи Краснодар краим ялIыкIохэр.

Урысыем и Почтэ иIофышIэхэу шъо­лъырэу «Къыблэм» щылажьэхэрэр ары зэнэкъокъугъэхэр, ахэр ащ ыпэкIэ якъу­тамэхэм ащытекIуагъэх. Почтэ сэнэхьатитфымкIэ анахь дэгъухэр къыхахыгъэх: отделением ипащэ, операторыр, почтальоныр, сортировщикыр ыкIи водителыр. Зэнэкъокъур едзыгъуитIоу гощыгъагъэ: теоретическэмрэ практическэмрэ.
Урысыем и Почтэ икъутамэу Адыгэ Республикэм щыIэм илIыкIомэ хагъэунэфыкIырэ чIыпIищ къыдахыгъ.
Лъэныкъоу «Сортировщик анахь дэгъу» зыфиIорэм ятIонэрэ чIыпIэр къыщыдихыгъ Анастасия Шевчук. «Оператор анахь дэгъу» зыфиIорэмкIэ ящэ­нэрэ хъугъэ Олеся Сидненкэр, «Поч­тальон анахь дэгъу» зыцIэ лъэны­къомкIэ ящэнэрэ чIыпIэр къыдихыгъ Рита Мацакян.
Воронежскэ хэкум къикIыгъэ Вера Воробьевар почтальон анахь дэгъоу къыхагъэщыгъ, текIоныгъэр къызэрэди­хыгъэр къэзыушыхьатырэ дипломыр ащ фагъэшъошагъ. Оператор­хэмкIэ апэрэ чIыпIэр Липецкэ ­хэкум щыщ Светлана Опенкинам ­ыхьыгъ. Почтэм икъутамэхэу Ростов хэкум итхэм яIофышIэхэу Ирина Чумаковам, Михаил Панферовым, Александр Роденковым текIоныгъэр къыдахыгъ.
Апэрэ чIыпIэр къызфагъэшъошагъэхэм шъолъырэу «Къыблэр» зэнэкъокъум ифинал къыщагъэлъэгъощт.