Къуаджэу Джыракъые щыщ Лъэстэнджэлмэ яунагъо непэ игугъу къэсшIы сшIоигъу. ­Илъэс пчъагъэ хъугъэу джырэ лъэхъаным диштэрэ IофшIэпIэ зэтегъэпсыхьагъэхэр къызэIуахы­гъэхэу мэлажьэх, нэбгырабэмэ IофшIэпIэ чIыпIэхэр арагъэгъотыгъ.

Унагъом исхэм чIыгур алэжьы, лэжьыгъэр зэращэ, гъэщым шхыныгъо зэфэшъхьафхэр хашIыкIых. Мылъкоу хахырэмкIэ цIыфхэм адэгуащэх.
Къызщыхъугъэхэ чылэм афэлъэкIыщтыр фашIэ. Ащ игупчэ кIэракIэу зэтырагъэпсыхьагъ: зыгъэпсэфыпIэ чIыпIэр, кIэлэцIыкIу джэгупIэхэр щашIыгъэх. Мэщытэу дэтым, гурыт еджапIэм, кIэлэ­цIыкIу IыгъыпIэм лъэшэу анаIэ атет, яшIуагъэ арагъэкIы. Спортым пылъ ныбжьыкIэхэу гъэхъагъэхэр зышIы­хэ-­
рэри зыщагъэгъупшэхэрэп. Хъяри, нэ­шхъэигъуи къызфыкъокIырэм ягъомы­-лапхъэ ахъщэр кIыгъоу лъагъэIэсы.
Ячылэ имызакъоу, гузажъоу, IэпыIэгъу зищыкIагъэу яуалIэрэр Iуагъэ­кIыжьырэп. Сэ сиунагъуи ахэм къахиубытагъ. Сырячылэп, сыряIахьылэп, ау яшIуагъэ къысагъэкIыгъ. ЯцIыфыгъэ фэшI атефэу ягугъу къэсэшIы ыкIи мы усэ цIыкIур афэсэгъэхьы.
ЧIыгу жъогъакIэр хьалыгъу бзыгъэу
Чылэм удэплъымэ гур къыдещае,
ГъучIы машинэу ыкIыIу итхэр
IэпыIэгъушхо лэжьакIом фэхъух.
Пхъэныр аухэу, кIымафэр къэсмэ,
Ос шъэбэ-фабэ чIым зыщигъотрэм,
Коцы бэгъуагъэу хыорым фэдэм
Шъофым икъухьэхэр тынчэу щесыных.
Коцы лэжьыгъэм жъэрымэр пихэу
Хьалыгъу-хьакушэр цIыфхэм агъажъэ,
Илъэсы шхынэу якон ушъагъэ
Бын-унэ Iужъур лъэшэу рэгушхо.
Унэгъо хыеу чIыгухэр зылэжьрэр
Хьарамыгъэнчъэу чылэм дэгуащэ.
ШIушIагъэу яIэр чыжьэу быбыгъэу
Дэсых хьалэлэу Джыракъ ичылэ.
Ячылэ дэсми, чылэм щымыщми
ЯгупцIэнагъэ бэмэ зэхашIэ.
Нэшхъэй зиIи, тхъагъо къыздэхъуи
Былымыр кIыгъоу мылъкур фащэи.
КIэлэ еджапIи, сабый IыгъыпIи,
Мэщытэу дэтми, цIыф гъэпсэфыпIи,
НэмыкI Iофэу чылэм щызекIуи
Чанэу хэлажьэх, ямылъкуи халъхьэ.
Завод инэу ащ агъэпсыгъэм
Былымым ищэ уалъэу ращалIэ,
Шхынэу хашIыкIрэм уигъэрэзэнэу
Лъэпкъ шхыныр ешIышъ, цIыфхэм ахещэ.
Тэ тикъэрали, къэрал чыжьэми
Щытхъушхор пылъэу гъэщыр аIофэ.
ЦIыф лэжьакIоу IофшIапIэм Iутхэр
Лъэшэу фэразэх Iоф къязытыгъэм,
Мазэр тешIагъэу лэжьапкIэр къатмэ,
Бын-унэ Iужъур къегъэунэжьы.
Батмэт Рэмэзан.