Адыгэ Республикэм искусствэ­хэмкIэ иколледж иеджакIохэм ащыщ мыгъэ диплом IофшIэ- гъэ гъэшIэгъон ыгъэхьазырыгъ. ЕджапIэр къэзыухырэ ермэл кIалэу Армен Карапетян адыгэ­хэм ядышъэидэ ыгъэфедэзэ, адыгэ лъэпкъ бзылъфыгъэ паIо ышIыгъ.

КIэлэ ныбжьыкIэм икIэлэегъаджэу, АР-м культурэмкIэ изаслуженнэ IофышIэу Ольга Плетневам зыIудгъакIи IофшIагъэм пылъ къэбарыр къедгъэIотагъ.
— Адыгееу тызщыпсэурэм илъэпкъ шэн-хабзэхэр тымыукъохэу непэрэ щы­IакIэм къызэрекIущтхэм игъэкIотыгъэу Iоф дэтэшIэ. ЕджакIохэм хэдыкIыным идесэхэр нахь Iэрыфэгъу зэрафэхъущтым тыпылъ. Анахьэу сыгу рихьырэр пэсэрэ лъэхъаным ашIыщтыгъэ пкъыгъохэр непэрэ мафэхэм зэрадиштэхэрэр ары. Уахътэм епхыгъэу хэдыкIыгъэхэр нахь кIэракIэ зэрэтшIыщт амалхэм талъы­хъугъ. Адыгэ лъэпкъ IэпэIэсэныгъэм къы­хиубытэрэ дышъэ IуданэкIэ хэды­кIы­гъэ­ныр сэ зэрысымыIоу нахь гъэшIэ­гъонэу Армен ыгъэфедагъ. Ащ иIофшIэн дэгъу дэдэу ыгъэцэкIагъ, — къеIуатэ Ольга Плетневам
Адыгэ бзылъфыгъэ паIор IэпэIэсагъэ хэлъэу, тхыпхъэ дахэхэр иIэу кIалэм ыгъэпсыгъ. Ижъырэ лъэпкъ Iэмэ-псымэхэр лъэхъаным епхыгъэхэу непэрэ мафэм диштэу бгъэфедэн зэрэплъэкIыщтыр кIэлэ ныбжьыкIэм къыушыхьатыгъ.
— Адыгэ лъэпкъым итарихъ, шэн-хабзэхэм гукIэ зафэбгъазэмэ, бзылъфыгъэм ищыIэкIэ-псэукIэ, IэпэIасэм ишIыкIэшIухэр нахь куоу зэбгъашIэхэ пшIои­гъоу зэгъэпшэнхэр ошIых. Адыгэ дышъэ хэдыкIыныр тиеджэн къызхахьэм, адыгэ шъуашэр лъэшэу сшIогъэшIэгъон хъугъэ. Бзылъфыгъэхэр дэн-бзэным нахь фэщагъэхэу щытыгъ, хъулъфыгъэхэр пхъэм, шъом, гъучIым адэлажьэщтыгъэх. Арэу щытми, адыгэ бзылъфыгъэ паIор сIэ къыхьыгъ. СикIэлэегъаджэ сыфэрэз шIэныгъэу къысхилъхьагъэмкIэ. ПэIо шIыным нахь куоу ыуж сихьан гухэлъ сиI, — къыIуагъ Армен.
Адыгэ паIом адыгэ шъуашэр къырегъэкъужьы, ау адыгэ паIор ежь изакъоми шъуашэ! Адыгэ паIом сыд фэдэрэ лъэхъани лъэпкъым осэшхо фишIыщтыгъ. Шъуашэм дагъо горэ иIэн ылъэ­кIыщт, ау паIом лъэшэу уфэсакъын фэягъэ. Тиадыгэ шъуашэ, дунаим тет цIыф лъэпкъхэм яшъуашэхэм ябгъап­шэмэ, анахь дахэу зэрагъэфагъэмэ ащыщ. Ар Кавказым ис цIыф лъэп­къыбэмэ зыщалъагъ.

Адыгэ паIом къыгъэлъагъорэр цIыф лъэпкъэу узщыщыр, узэрэадыгэр ары. Пшъэшъэ паIор кIэракI. Адыгэ хъулъфы­гъэ паIор зыщыплъэным пае дипломи, IэнатIи ищыкIагъэп. ЗэкIэмэ ащыгъын фит: цIыкIуи ини, еджагъи емыджагъи, IэнатIэ зиIи зимыIи, байи тхьамыкIи — уадыгэмэ екъу. Ау адыгэ пшъашъэм сае щымыгъымэ, паIор непэрэ щыгъыным къыдиштэрэп.
Адыгэ шъуашэхэр къэзыгъэдэхэрэ паIом мэхьанэшхо иI. Ахэм тхыпхъэ гъэнэфагъэхэр атешIыхьагъэу, зэфэмыдэу щытых. ЕджапIэм узэрэчIахьэу лъэпкъ пкъыгъохэу еджакIохэм аIапэ къычIэкIыгъэхэр зыщыугъоигъэ мэкIаим уIокIэ: ныбжьыкIэхэу мастэрэ дышъэ Iуданэрэ зыгъэIорышIагъэхэм ашIыгъ жьыфыр, Iэлъмэкъхэр, пхъэ цуакъэр, къэптан хэдыкIыгъэр, нэмыкIхэри. Мэстапэр шэкIым пхыращызэ, Iудэнэ гъо­жьышъом илъэужхэр дышъэпс егъэшъуа­гъэхэм фэдэу лъэпкъ тхыпхъэм къытенагъэх.
Ольга Плетневам исэнэхьат хэ­шIыкI ин зэрэфыриIэм щэч хэлъэп. Дышъэ хэдыкIыным ишъэфэу еджакIохэм аригъэлъэгъурэм къыкIэкIуагъэм нэр егъэгушIо, гур егъэгушхо. Адыгэхэм яшэн-­хабзэхэм ядэхагъэ IофшIагъэхэм къа­щэлъагъо.

Лъэпшъыкъо Фатим.
Сурэтхэр авторым иех.