ГъэпцIагъэ зыхэлъ бзэджэшIагъэ къыдызэрахьагъэу илъэс 27-рэ зыныбжь хъулъфыгъэм Мыекъуапэ идежур­нэ часть зыфигъэзагъ.

Ащ къафиIотагъ тхьамэфитIум къыкIоцI ымышIэрэ горэхэр ителефон къыфытеохэзэ, къулыкъу зэфэшъхьаф­хэм «яIофышIэхэу» къыраIуагъ. КIэлэ ныбжьыкIэм къыдэгущыIэхэзэ, икъэбар къырагъэIотагъ, ау ежь зыпарэми егу­цэфагъэп.
Нэужым нэмыкI горэ къыфытеуи, икартэ пылъ къэбарыр зэрэщытэу гъэпцIакIохэм зэраIэкIэхьагъэр къыриIуагъ ыкIи икартэ илъ ахъщэр амытыгъуным фэшI «щынэгъончъэ счетым» ригъэхьан фаеу гуригъэIуагъ, ышIошъ ыгъэхъугъ.
ГъэпцIакIом цыхьэ фишIи къыриIуа­гъэр зэкIэ кIалэм ыгъэцэкIагъ. ЗэIуигъэкIэгъэ ахъщэр, джащ фэдэу чIыфэ заулэу банкым къыIихыгъэр, машинэр зещэжьым къыкIэкIогъэ ахъщэр, зэкIэмкIи сомэ миллионитIурэ мин 200-рэ хъулъфыгъэм шIуатыгъугъ.
Иахъщэ гъэпцIакIохэм зэрэшIуатыгъугъэр кIалэм иIахьылхэр ары къэзы­шIагъэр. Мы хъугъэ-шIагъэмкIэ уголовнэ Iоф къызэIуахыгъэу зэхэфынхэр макIох.
АР-м хэгъэгу кIоцI IофхэмкIэ и Министерствэ
ипресс-къулыкъу