ФутболымкIэ Урысые зэнэкъокъоу «Хьэшъо Iэгуау»» зыфиIорэм иреспубликэ едзыгъо Мыекъуапэ щыкIуагъ.

Футболист ныбжьыкIэхэр зыхэ­лэжьэхэрэ Iофтхьабзэр илъэс къэс зэхащэ ыкIи мы лигэм ще­шIэрэ командэхэм уцугъуищ къа­кIу. АпэритIум апхырыкIыхэрэр Урысые едзыгъом хэлажьэх.
Iофтхьабзэм пшъэрылъ шъхьа­Iэу иIэр физическэ культурэм ыкIи спортым, анахьэу футболым, апыщагъэхэм япчъагъэ хэгъэхъо­гъэныр, мы спорт лъэпкъымкIэ командэ анахь лъэшхэр къыхэгъэщыгъэнхэр ары.
Аныбжь елъытыгъэу командэхэр купищ мэхъух, джащ фэдэу къоджэ ыкIи къэлэ дивизионхэмкIэ гощыгъэх. АнахьыкIэ купым 2013 — 2014-рэ илъэсхэм къэхъу­гъэхэр хэхьэх, гурытым — 2011 — 2012-рэ илъэсхэм, нахьыжъым — 2009 – 2010-рэ илъэсхэм къэ­хъугъэхэр ащызэнэкъокъух.
Республикэ едзыгъом къыдыхэ­лъытэгъэ ешIэгъухэр стадионэу «Юность» зыфиIорэм щыкIуагъэх. Зэфэхьысыжьхэм къызэрагъэлъэ­гъуагъэмкIэ, нахьыкIэ ыкIи гурыт купхэм текIоныгъэр къащыдэзыхыгъэхэр Красногвардейскэ районым икомандэхэр ары. Нахьыжъхэм якуп анахь щылъэшыгъ Кощхьэблэ районыр. Ахэр зэнэкъокъум и Урысые финал хэлэжьэнхэмкIэ фитыныгъэ къыдахыгъ.
ТекIоныгъэр ыкIи хагъэунэфыкIырэ чIыпIэхэр къызфагъэшъошагъэхэм кубокхэр, щытхъу тхылъхэр ыкIи медальхэр аратыжьыгъэх.