Мы мафэхэм Адыгеим ихьэкIагъ УФ-м хэдзынхэмкIэ и Гупчэ комиссие хэтэу Антон Лопатиныр. УФ-м и Президент ихэдзынхэу гъэтхэпэ мазэм щыIагъэхэр зыщызэфахьысыжьыгъэхэ ыкIи тапэкIэ пшъэ­рылъхэр зыщагъэнэфэгъэ­хэ зэхэсыгъоу тыгъуасэ Правительствэр зычIэт Унэм щыкIуагъэм ар хэлэжьагъ. АР-м хэдзынхэмкIэ и Гупчэ комиссие итхьаматэу Сэмэгу Нурбый Iоф­тхьабзэр зэрищагъ.

Джащ фэдэу зэхэсыгъом хэлэжьа­гъэх АР-м и ЛIышъхьэрэ иминистрэхэм я Кабинетрэ я Администрацие ипащэу Владимир Свеженец, чIыпIэ ыкIи участковэ хэдзыпIэ комиссиехэм ахэтхэр, къулыкъу зэфэшъхьафхэм ялIыкIохэр.
Антон Лопатиным пстэумэ апэу УФ-м хэдзынхэмкIэ и Гупчэ комиссие ипащэу Элла Панфиловам, зэкIэ хэтхэм ацIэкIэ шIуфэс къарихыгъ. УФ-м и Президент ихэдзынхэу мы илъэсым щыIагъэхэм язэхэщэнкIэ Адыгеим и Гупчэ комиссие Iоф зэришIагъэм ащ осэ ин къыфи­шIыгъ, чIыпIэ ыкIи участковэ комиссиехэм къызэрафэразэхэр къыхигъэщыгъ. Адыгеим и ЛIышъхьэ хэдзынхэр щынэгъончъэу зэхэщэгъэнхэм, комиссиехэм Iоф­шIэкIэ амал тэрэзхэр ятыгъэнхэм ынаIэ зэрэтетыгъэм фэшI къызэрэфэразэхэм хэушъхьафыкIыгъэу къыкIи­гъэтхъыгъ.

— УФ-м и Президент ихэдзынхэм «Вместе мы сила — голосуем за Россию!» девизэу яIагъэр. Адыгеим ар къыгъэшъып­къэжьыгъ. ХэдзынхэмкIэ рес­публикэ комиссием исистемэ хэтхэм хэбзэгъэуцугъэм диштэу япшъэрылъхэр зэрагъэцэкIа­гъэхэм, хэдзакIо пэпчъ Iоф зэрэдашIагъэм ишIуагъэкIэ къэгъэлъэгъон дэгъухэм анэсыгъэх. ХэдзакIоу къекIолIагъэхэм яп­чъагъэкIи, УФ-м и Президентэу Владимир Путиным зымакъэ фэзытыгъэхэмкIи апэ итхэм рес­публикэр ащыщ, — къы­Iуагъ ащ.
Сэмэгу Нурбый джыри зэ пчъагъэхэм къафигъэзэжьзэ къызэриIуагъэмкIэ, хэ­дзынхэм ахэлэжьэным зы­ныбжь нэсы­гъэу республикэм исым ипроцент 84,7-м ехъумэ амакъэ­хэр атыгъэх. Ащ ипроцент 90,1-м Владимир Путиныр Президентэу хэдзыжьыгъэным дырагъэштагъ. УФ-м и Президент ихэдзынхэмкIэ республикэр апэрэу ащ фэдэ пчъагъэхэм анэсыгъ. Шъугу къэдгъэ­кIыжьын, Урысыер зэрэщытэу пштэ­мэ, хэдзынхэм ахэлэ­жьагъэ­хэм япроцент 87,2-мэ Владимир Путиным амакъэ фатыгъ.
Владимир Свеженец АР-м и ЛIышъхьэ ыцIэкIэ шIуфэс къари­хыгъ.
— УФ-м хэдзынхэмкIэ и Гупчэ комиссие ипащэу Элла Панфиловам республикэм сыдигъокIи ынаIэ къызэрэтетым фэшI тызэрафэразэр лъыдгъэIэсмэ тшIоигъу, — къыIуагъ ащ. — Хэдзын пстэуми тынаIэ атет, язэхэщэни, зэрэкIощтхэми талъэплъэ, ищыкIагъэ хъумэ шъолъыр избиркомым IэпыIэгъу тыфэхъу. Къэралыгъо политическэ хъу­гъэ-шIэгъэ инэу Урысыем и Президент ихэдзынхэм нахь лъэшыжьэу тынаIэ атетыгъ.
Адыгэ Республикэм и ЛIышъхьэ Уры­сыем хэдзынхэмкIэ и Гупчэ комиссие зэрэфэразэр, хэдзынхэм мэхьанэу ара­тыгъэм афэгъэхьыгъэу исоциальнэ нэ­кIубгъохэм къащитхыгъ ыкIи пшъэрылъ благъэхэм ягугъу къащишIыгъ.

«Тызэгъусэу типшъэрылъхэр зэ­шIо­тхыщтых, тапэкIи хэдзынхэмкIэ шъолъыр комиссием тыдэлэжьэщт. Хэдзын кам­паниеу щыIэщтхэм цифрэ шIыкIакIэхэр ащыгъэфедэгъэнхэм анахьэу тынаIэ те­дгъэтыщт.
Хэд­зын комиссиехэм ахэтхэм зэкIэми сафэраз пшъэдэкIыжь ин хэлъэу, Iофым хэшIыкI фыряIэу зэрэзэшIуахыгъэм пае. Урысыем хэдзынхэмкIэ и Гупчэ комиссие зэдэлэжьэныгъэу дытиIэр тапэкIи дгъэ­пытэным тыщэгугъы!» — къытхыгъ Къум­пIыл Мурат.
Зэхэсыгъом икIэухым Антон Лопатиным республикэ, чIыпIэ ыкIи участковэ комиссиехэм ахэтхэу УФ-м хэдзынхэмкIэ и Гупчэ комиссие итынхэр къызфагъэшъошагъэхэм къаритыжьыгъэх.
Джащ фэдэу комиссиехэм ахэтхэм ащыщхэр АР-м и ЛIышъхьэ, Адыгеим хэдзынхэмкIэ и Гупчэ комиссие ярэзэныгъэ ыкIи ящытхъу тхылъхэмкIэ къыхагъэщыгъэх.
ХЪУТ Нэфсэт.
Сурэтхэр: А. Гусев.