Урысыем IофшIэнымкIэ и ЛIыхъужъэу, Адыгеим, Къэбэртэе-Бэлъкъарым, Къэрэщэе-Черкесым ялъэпкъ тхакIоу МэщбэшIэ Исхьакъ КъЧР-м икъэралыгъо тын анахь лъапIэу орденэу «Къэрэщэе-Черкесым ыпашъхьэ гъэхъагъэу щыриIэхэм апае» зыфиIорэр къош республикэм и ЛIышъхьэу Рэщыд Темрезовым тыгъуасэ къыритыжьыгъ.

— Лъэпкъыбэ урысые литерату­рэм ихахъо, ныдэлъфыбзэм икъэ­ухъумэн, шъолъыр зэдэлэжьэны­гъэм ягъэпытэн иIахьышхо зэ­рахишIыхьэрэм пае сигуапэу къэралыгъо тыныр МэщбэшIэ Исхьакъ естыжьыгъ, — хигъэу­нэфыкIыгъ Рэщыд Темрезовым. — ТхакIор ыкIи общественнэ IофышIэшхор Урысыем щыпсэурэ лъэпкъхэм языкIыныгъэ, яхъар­зынэщ ихахъо псэемыблэжьэу афэлажьэ. Роман 60-м ехъу, усэхэр ыкIи прозаическэ тхы­гъэхэр зыдэт тхылъ пчъагъэ ащ къыдигъэкIы­гъэх, бзэ зэфэ­шъхьафхэмкIэ ахэр зэрадзэкIы­гъэх. Адыгэ Республикэм игимн игущыIэхэри зытхыгъэр МэщбэшIэ Исхьакъ.
МэщбэшIэ Исхьакъ щыIэныгъэ гъогоу къыкIугъэм ыкIи иакъыл ичаныгъэ яшIуагъэкIэ Iофыгъо анахь шъхьаIэхэмкIэ ежь иеплъыкIэ сыдигъокIи иI. И Хэгъэгу ыкIи ышIэрэ Iофым зэрафэшъыпкъэмкIэ, шIу зэрилъэгъухэрэмкIэ ищыIэныгъэ гъогу зэрэщытэу тищысэтехыпI.
— Урысыем илъэпкъхэм якультурнэ хъарзынэщ нахь лъэшэу къэзгъэ­баищт творческэ проектыкIэхэм адэлэжьэн ылъэкIыным пае псауныгъэ пытэрэ кIуа­чIэрэ иIэ зэпытынэу МэщбэшIэ Исхьакъ фэсэIо! – къыщитхыгъ Рэщыд Темрезовым ителеграм-канал.
Лъэпкъым итхэкIо цIэрыIо зичэзыу тынкIэ иIофшIагъэ къызэрэхагъэщыгъэм фэшI тыфэгушIо.