Республикэм къыщагъэкIырэ лэжьыгъэ лъэпкъ зэфэшъхьафхэм джыри зы къахэхъуагъ. Джэджэ районым имэкъумэщ хъызмэтшIапIэу «Краснодарагроальянс» зыфиIорэм кIэплъэтхъой гектар 60 фэдиз мыгъэ ышIагъ. ИлъэпкъкIэ «Ы 220» зыфаIорэм фэд, дэгъэхэкI. Непэ ар Урысыем анахьэу къызщыкIэупчIэхэрэ лэжьыгъэхэм ащыщ. Фармакологием, шхыным ащагъэфедэ, шIуагъэ къэзыхьырэ витаминыбэ хэлъ.

— Шъыпкъэр пIощтмэ, илъэситIукIэ узэкIэIэбэжьмэ гектарих хъоу кIэплъэтхъоир апэрэу тпхъыгъагъ. Ащ дэжьым Iоф зыдатшIэмэ хъущт лэжьыгъа­кIэхэм талъыхъущтыгъ, сыда пIомэ джырэ нэс къэдгъэкIы­гъэхэм ауж уитыныр ащ фэдэу федэжьэп. Ащ дэжьым кIэплъэтхъоим дэгъоу зыкъыгъэлъэ­гъуагъ, гъэбэжъури иныгъэ. ГумэкIыгъор къызпыкIыгъэр иIугъэ­кIын, ари зэрэмакIэм къы­хэкIэу. Ары нахь мышIэми, дэ­гъоу тщагъэ, — къыддэгощагъ хъызмэтшIапIэм иагроном шъхьаIэу Олег Песоцкэр.
ЗэрэрахъухьэрэмкIэ, мыгъэрэ кIэп­лъэтхъоим гектарым центнер 18-р къы­рахынэу ары. Лэжьыгъэм инепэрэ зытети ар къеушыхьаты. ИкъыхэкIыгъом огъум къиныгъохэр къафихьыгъэхэми, непэ зэтеуцожьыгъ. ПIуакIэу къызщыкIыгъэр хьэсэ Iупэр ары, икуупIэкIэ Iужъу, кIэр пиз. ИIожьыни гумэкIыгъо къыпыкIынэу щытэп. Хьэмрэ коцымрэ зэрэIуахыжьырэ комбайнэр иугъоижьын­кIэ къекIу.
— КIэплъэтхъоим икъэгъэкIын къин пылъэп. ШъхьаIэр чIыгур дэгъу дэдэу бгъэхьазырыныр ары. Лъэпсэ куу зэримы­дзырэм къыхэкIэу чIыр зэшъхьэзашъоу бгъэ­ушъэбын фае. Адрэ пстэумкIи гумэкIыгъо къыпыкIырэп, епшIылIэнэу щытыр макIэ. ЗеппхъыкIэ, уцыжъыр къы­те­мыкIонэу ищыкIагъэр еохьылIэ ныIэп, — къыт­фиIотагъ хъызмтэшIапIэм иагроном шъхьаIэ.
ШышъхьэIу мазэм дэжь кIэплъэтхъоир Iуахыжьынэу щыт, иIугъэкIыни гумэкIыгъо къыпыкIыщтэп, зыштэщтыр щыI. Мыгъэ зыкъызэригъэлъагъорэм елъытыгъэу къэкIорэгъэм джыри къагъэкIын алъэкIыщт.

«Краснодарагроальянсым» мыгъэ апэрэу ылэжьыгъэмэ ащыщ шъоущыгъу чIыплъыр. ЧIыгу гектар 210-рэ ащ рагъэубытыгъ. КIэплъэтхъоим къыголъ хьасэм ар щэуцышъо. Шъоущыгъу чIыплъыри хъызмэтшIапIэм къыгъэкIырэмэ ащыщ ышIы шIоигъу. Ащ къыдыхэлъытагъэу мыгъэ еуплъэкIу.
— Шъоущыгъу чIыплъым икъэгъэ­кIынкIэ пхъэ Iашэхэр шъхьафэу уиIэнхэ фае. Коцымрэ хьэмрэ зэрэтылэжьыхэрэр ащ къекIущтхэп. ЗэрэIупхыжьыщтыри, укъызэрэдекIокIыщт техникэри хэушъхьа­фыкIыгъэх. Колхозхэм, совхозхэм къа­кIэныгъэхэр зиIэхэмкIэ ар Iэрыфэгъу. Арынчъэу зэкIэ кIэу пщэфын фае. Арэу зыхъурэм лъапIэу къекIы. ЕтIани гумэкIыгъуабэ къызпыкIырэр изещэн, ащ пэIухьажьырэр къызибдзэкIэ федэжьэп, — еIо Олег Песоцкэм.
ПстэумкIи хъызмэтшIапIэм лэжьыгъэ­шIэпIэ гектар минихым нахьыбэ ыIыгъ. Анахьэу къыгъэкIырэр коцыр ары, гектар 2300-рэ, ащ ыуж къикIыхэрэр тыгъэгъазэмрэ натрыфымрэ.
Анцокъо Ирин.
Сурэтхэр авторым иех.