Адыгэ Къэралыгъо филармонием и Нысхъэпэ театрэу «Дышъэ къошын» зыфиIорэм икъэгъэлъэгъон лъэхъан ыкIэ зэрэфыкIуагъэм фэгъэхьыгъэ Iофтхьабзэу «Сыбзэ — ситам» зыфиIорэр апэрэу мэкъуогъум и 23-м щыкIуагъ.

Уахътэр макIо, дунаим зэхъокIыныгъэхэр фэхъух. Нысхъэпэ театрэри зы чIыпIэ итэп. Непэрэ уахътэм зырэдиштэщт шапхъэхэмрэ амалхэмрэ егъэфедэх. Мы къэгъэлъэгъоныкIэм нысхъапэхэр адыгабзэкIэ къэгущыIэх. КIэлэцIыкIухэу пшысэмэ яплъыхэрэм ахэт тыгъужъым «ТIэкIу сыжъудэджэгунэу сыфай, дэгъуба?», еIошъ, къяупчIы. Нысхъапэу «Къух» адыгэ орэдыжъэу шъошакIэм илъым дежъыу. КъекIолIэгъэ сабыйхэм орэдэу «Синан» къызэдаIо. ГъэшIэгъон дэдэр псэушъхьэ Iэли, нысхъэпэ цIыкIуи адыгабзэкIэ къызэрэгущыIэхэрэр ары.
— «Сыбзэ — ситам» зыфиIорэ къэгъэлъэгъоным сценэм тет артистхэмрэ кIэлэцIыкIоу еплъыхэрэмрэ зэрепхых, нахь зэпэблагъэ ешIых, яшIэныгъэхэм ахегъахъо, лъэпкъым игушъхьэлэжьыгъэ бай анаIэ нахь тырарегъадзэ, ныдэлъфыбзэм иIэшIугъэ алъегъэIэсы. Анахьэ хэзгъэунэфыкIы сшIоигъор пшысэм еплъынэу къэкIогъэ кIэлэцIыкIухэр къэгъэлъэгъоным зэрэхэлажьэхэрэр ары. Еплъыхэрэр ары герой шъхьаIэхэр. Ахэм тадэджэгузэ, адыгабзэкIэ къэтэгъэгущыIэх, пшысэм хэтэщэх, — еIо Нысхъэпэ театрэм ипащэу Джолэ Ларисэ.
Нысхъэпэ театрэм ихудожественнэ пащэу, АР-м инароднэ артистэу Сихъу Станислав къызэриIуагъэмкIэ, кIэлэцIыкIумэ афытегъэпсыхьэгъэ къэгъэлъэгъонхэу адыгабзэм фэгъэхьыгъэхэр нахьыбэу зэхищэнхэм «Дышъэ къошыныр» пылъыщт.
Къэгъэлъэгъоныр режиссерэу Нэгъой Зуриет ыгъэ­уцугъ. КIэлэцIыкIухэм ныбджэгъуныгъэу зэдашIыгъэр агъэпытэзэ ямурадхэм афэкIох. Пэрыохъухэр къызэранэкIыгъэх. Ащ ишIуагъэкIэ мэзым гушIогъо макъэхэр икIэрыкIэу щыIужьыгъэх, зэныбджэгъухэр зэфэнэгушIохэу зэпэгъокIых.
— КIэлэцIыкIу театрэм иактерхэр джэгун сэнэхьатым лъэшэу фэlазэх. Культурэ ин зэрахэлъыр къахэщэу, артистхэм сценэм зыкъыщагъэлъагъо, спектаклым еплъынэу къэкIуагъэхэм ащ ыкупкI анагъэсы. Къэгъэлъэгъоныр къекIолIагъэхэм агу рихьынэу тыщэгугъы, бзэр нахь шIу ядгъэлъэгъуным, ыпэкIэ нахь гъэшIэгъо­нэу дгъэпсыным тыпылъыщт, — еIо спектаклыр зыгъэуцугъэ режиссерэу Нэгъой Зурет.
«Дышъэ къошыным «театральнэ лъэхъаныр гъэшIэгъонэу мы илъэсым ыгъэпсыгъ. Пшысэу къагъэлъагъо­хэрэм сабыйхэр дэхагъэм фепIух, кIэлэцIыкIухэм лъэ­шэу ахэр агу рехьых.
Актерхэр мыгуlэхэу, гукlэ ащэчырэр къыбгурагъаlоу, lофышхоу ашlэрэм ори уадыхэтэу къыпщагъэхъоу спектаклым кIэлэцIыкIухэр ыумэхъэу еплъыгъэх.
«Дышъэ къошыным» илъэс IофшIэгъур джащ щиу­хыгъ. Бжыхьэм къэгъэлъэгъоныкIэу къагъэхьазэрыщтхэм тяжэщт.
Лъэпшъыкъо Фатим.
Сурэтыр авторым ий.