Шэуджэн районым щыпсэурэ Даур Нурбый УФ-м имэкъумэщ (фермер) хъыз­мэтшIапIэхэм ыкIи имэкъумэщ кооперативхэм я Ассоциацие имедалэу «Урысыем изаслуженнэ фермер» зыфиIорэр Москва щыкIогъэ зэхахьэм къыщыратыжьыгъ. Ащ ихъызмэтшIапIэ «Адыгэ макъэр» еблэгъагъ, иIофшIэн зэ­рэзэхищэрэм зыщигъэгъозагъ.

Даур Нурбый Къэбэхьаблэ щэпсэу, къуаджэм илэжьэкIо цIэрыIохэм ащыщ. Дзэ къулыкъум къызекIыжьым къуаджэм щызэхащэгъэ колхозым имэлыхъу фермэ щылэжьэнэу ригъэжьагъ. Мыекъопэ мэкъумэщ техникумыр зоотехникэу къыухыгъ. 1991-рэ илъэсым колхозыр зызэхэтакъом чIыгур къаIихыжьи, Iоф­шIэным фежьагъ, чылэм дэс цIыфхэм ягектар 350-рэ илъэсыбэм ылэжьыгъ. Непэрэ мафэмкIэ мэкъумэщ хъызмэтшIапIэм иунаеу чIыгу гектари 150-рэ елэжьы. Коцыр, натрыфыр, тыгъэгъазэр, хъырбыдзыр шъофым къыщегъэкIы. Былымхъуными ыкIи чэтхъуными апылъ. Мы IофшIэным зэрэбынэу хэщагъ — шъхьэгъусэр бухгалтер, ыкъохэу Айтэчи, Айдэмыри, ыпхъоу Лариси, икъорэлъф­хэри къыдеIэх.
— Къэралыгъо грантхэм якъихын пчъагъэрэ сыхэлэжьагъ, — еIо Нурбый. — Ахэр тэщ фэдэ мэкъумэщышIэхэмкIэ IэпыIэгъушIух. ГущыIэм пае, грантым ишIуагъэкIэ сомэ миллионищым ехъу зыосэ трактор, былымышъхьэ 25-рэ къэтщэфыгъ. ЧIыфи, гумэкIи уахэмытэу зыкъэпIэтынымкIэ ар IэпыIэгъушIу. Мы илъэсми къэралыгъо грантым икъыдэхын джыри сыхэлэжьэщт. Ахъщэ IэпыIэгъум чэмышъхьэ 25-рэ къырысщэфын, сиIэм хэзгъэхъон симурад. Къелыжьмэ, джыри зы трактори къырысщэфыщт. IофшIэным ныбжьи тыкъызэкIигъэкIуагъэп, тикъарыу елъыфэ ыпэкIэ едгъэхъущт. Къэралыгъом ыкIи республикэм яIэпыIэгъушхо зэхэтэшIэ, джащ фэдэу тапэкIи лъыкIотэнэу тэгугъэ, — къыхигъэщыгъ фермерым.

Нурбый къызэриIуагъэмкIэ, лэжьакIо­хэм сомэ мин 20-м нахь мымакIэу лэжьапкIэ ареты, аIашъхьэ къылэжьырэр илъэсым ашхыжьы. Чэмхэр зэращырэм ишIогъэшхо къэкIо. Гъэщыр щэ заво-
дым раты, ащ къыкIакIорэмкIэ лэжьапкIэр цIыфхэм араты, чэтIусыри къыращэфы.
— Къэралыгъо мэкъумэщ субсидиехэм яшIогъэшхо къызэрэкIорэр сыушэтыгъ. ЦIыфхэм къашIошIырэр ахъщэ чIыфэм фэдэу ахэм къябгъэгъэзэжьын фаеу ары, бэхэр мэщынэх е къагурыIорэп. Мэкъумэщым хэщэгъэ ныбжьыкIэхэм ясIомэ сшIоигъу, грант зэнэкъокъухэм шъумыщынэу шъуахэлажь.
Даур Нурбый илъэс 30-м къехъугъ зыфермерыр. Адыгэ Республикэм ифермерхэм я Союз итхьаматэу Дзэхъохъу Аслъан IэпыIэгъу зэрафэхъурэр, грантхэм якъыдэхынкIэ ишIуагъэ лъэшэу къызэраригъэкIырэр игуапэу ащ хи­гъэунэфыкIыгъ. Адыгеим исатыушIхэм я Фонди чIыфэ зытенэгъэ мэкъумэщ хъызмэтшIапIэхэм ишIуагъэ арегъэкIы. А зэпстэур, щэч хэмылъэу, фермерхэм ямызакъоу шъолъырым имэкъу-мэщ хъызмэт зэрэщытэу хэгъэхъоныгъэ ышIы­ным фэлажьэ.

Нурбый ишъхьэгъусэу Щаймэт тыщигъэгъозагъ:
— Унагъом илъ фэбагъэм, гупсэфыныгъэм, зыкIыныгъэм ягъэпытэн мэхьанэшхо иI. Нурбый рихьыжьэгъэ Iофыгъом изэшIохынкIэ сэри сыгоуцуагъ. Сабыйхэм зыкъызаIэтым ятэ пкъэу пытэу кIэуцуагъэх. Шъхьадж лъэныкъо гъэнэфагъэм фэгъэзагъэу тиIофшIэн лъэпсэ пытэ иIэ хъугъэ.
— ЫпшъэкIэ зигугъу къэтшIыгъэ Iоф­тхьабзэу тызхэлэжьагъэм медалэу къыс­щыфагъэшъошагъэр сизакъоу къэзлэ­жьыгъэп, сиунагъуи сигъус, — еIо Нурбый.
Ащ зэрилъытэрэмкIэ, анахь мэхьанэ зиIэр яхъызмэтшIапIэ зыпкъитыныгъэ иIэу Iоф ышIэныр, лэжьыгъэу къахьыжьырэм хигъэхъоныр, ар осэшIукIэ Iуигъэ­кIыжьыныр ары. ЧIыгулэжьынымкIэ, былымхэм ыкIи щагубзыухэм яхъункIэ опыт инэу IэкIэлъ хъугъэм къыкIэхъу­хьагъэхэр щегъэгъуазэх.
Гъэмэфэ IофшIэнхэм яжъотыпI, лэ­жьыгъэм иIухыжьын хъызмэтшIапIэм ригъэжьэщт.
Лъэпшъыкъо Фатим.
Сурэтхэр: Iэшъынэ Аслъан.