АР-м и Лъэпкъ музей зичэзыу хьакIэщ Iофтхьабзэ щырекIокIыгъ. АР-м иIэпэIасэхэм ыкIи лъэпкъ IэпэщысэшIыным пылъхэм я Ассоциацие хэт Гумэ Ларисэ я 6-у ар ыгъэхьазырыгъ. КIэщакIом IэпыIэгъу фэхъугъэх зэлъашIэрэ IэпэIасэхэу Битэ Азэрэ Джарымэкъо Зуретрэ.

«Сэтэнае и Маф» зыфиIорэ Iофтхьабзэхэм япшъэрылъхэм ащыщ лъэпкъ культурэм зегъэужьыжьыгъэныр, уахътэм хэкIодэгъэ шэн-хабзэхэр щыIэныгъэм къыхэщэжьыгъэнхэр. Тыкъэзыуцухьэрэ дунаир кIэлэцIыкIухэмрэ ныбжьыкIэхэмрэ нахьышIоу къагурыIоным, ялъэныкъо гупсэ агъэлъэпIэным, тарихъыр, искусствэр, шэн-хабзэхэр зэрагъашIэхэзэ, щыIэныгъэм еплъыкIэу фыряIэм зегъэ­ушъомбгъугъэным, творческэ гупшысэу ахэлъыр нахьышIоу агъэфедэным зэхахьэр афэгъэхьыгъагъ. ЗэхэщакIохэм къызэраIуагъэмкIэ, мыщ фэдэ зэIукIэхэр нахьыбэ хъунхэм тапэкIи дэлэжьэщтых.
Зэхахьэм къекIолIагъэхэр Сэтэнэе гуащэм идышъэ Iуданэ зэрипхыгъэх. Iэпэщысэу искусствэ хъугъэм идесэхэу Ларисэ къыгъэхьазырыгъэхэм адыгэ культурэм ибаиныгъэ къырагъэлъэгъу­кIыгъ.
— Адыгэмэ яIэпэщысэшIын пшъэшъэ ныбжьыкIэхэм мэхьанэшхо иIэу сэлъытэ. НыбжьыкIэхэм непэ тэ ядгъэлъэ­гъурэ щысэр ары тапэкIэ зэрэпсэущтхэр. Адыгэ пшъашъэ пэпчъ дышъэ хэдыкIынымкIэ IэпэIэсэныгъэ хэлъыныр шап­хъэу щытын фае, — къыхигъэщыгъ зэхахьэм икIэщакIоу Гумэ Ларисэ.
Тинахьыжъ пIашъэхэм къытфыщанэгъэ Iэпэщысэхэр, лъэпкъ IэшIагъэхэр гъашIэм илъэмыджых, лIэужхэр зэрапхых.

Сэтэнае идышъэ Iуданэ идесэхэм ахэлэжьэгъэ бзылъфыгъэмэ IофшIэным икIэуххэр зэфахьысыжьыгъэх. Шъхьадж ышIыгъэ IэшIагъэм щыгушIукIыгъ. Сэтэнае идышъэ Iуданэ, пшысэхэм афэгъэхьыгъэ зэIукIэхэр щыIэныгъэм дештэх. Мастэр, Iуданэр, шэкIыр агъэфедэхэзэ, хэлажьэхэрэм пкъыгъо гъэшIэгъонхэр ашIыгъэх, хадыкIыгъэ тхыпхъэхэм лъэпкъ гупшысэ ахэлъ. ШIухьафтын пшIын плъэ­кIыщт пкъыгъуабэ ашIыгъ.
Пшъашъэхэр дэным, бзэным нахь афэщагъэхэ зэрэхъухэрэм уегъэгушIо. Анахь узыгъэгушхохэрэр илъэси 10 — 13 зыныбжь пшъэшъэжъые цIыкIухэу зэхахьэм хэлэжьагъэхэр ары.
— НыбжьыкIэхэм щысэ зытырахын тиI, — къытиIуагъ IэпэIасэу Джарымэкъо Зурет. — Сэтэнае идышъэ Iуданэ идэхагъэ щыIэныгъэм хэкIуакIэрэп. Модэм бэрэ тегущыIэх, ари дэгъу, ау ащ нахь дэгъужь лъэпкъ шIэжьым къыпкъырыкIыхэзэ, лъэпкъ Iофтхьабзэхэм ныбжьыкIэхэр нахь чанэу ахэлэжьэнхэр.
Дышъэидагъэхэр зыщыгъэфедэгъэ IэшIагъэхэр джырэ мафэм диштэу ныбжьыкIэхэм ащыгъыным IэпэIасэхэр кIэхъопсых. Джащ фэдэ гугъапIэхэр непэ нэфапIэ хъунэу тыщэгугъы. Сэтэнае иIуданэ орэшIэт!
Лъэпшъыкъо Фатим.
Сурэтыр: Гумэ Ларис.