Мэздахэ ичIыналъэу гектари 7,7-м непэрэ мафэм игъэкIотыгъэу зэтегъэпсыхьан IофшIэнхэр щэкIох. Мыр зыгъэпсэфыпIэу рахъухьэрэм иапэрэ чэзыу.

Ащ идэхьапIэ, дэкIояпIэм пэчIынэтIэ лъэныкъоу Нэгыежъ Iошъхьэ къушъхьэтхым гъэза­гъэм нэсэу джырэ уахътэм псэолъэшIынхэр щэкIох.
«Анахьэу тызпылъыр чIыопсыр къызэтедгъэнэныр ары, экологием къыхэкIыгъэ ыкIи пкъыгъо пытэхэр ары дгъэфедэхэрэр.
Мэз парк «Мэздахэу» гектар 435-рэ къызэлъызыубытырэр зы чIыопс чIыпIэшхоу уахътэр гъэшIэгъонэу зыщыбгъэкIошъущтэу ыкIи чIыопсым, нэмыкI чIыпIэ хьалэмэтхэм ядэхагъэ зыщызэхэпшIэшъущтэу щытыщт: зы къушъхьэтх лъэныкъом — Мые­къуапэ, адрэм — Адыгеим икъушъхьэлъапэхэмрэ икъушъхьэшыгухэмрэ», — къащитхыгъ Адыгеим и ЛIышъхьэ исоциальнэ хъытыухэм.
Мыщ джащ фэдэу амал щыряIэщт псауныгъэм игъэпытэни, спортми щапылъынхэу, унэгъо зыгъэпсэфынми, нахь чанэу зиуахътэ зыгъакIо зышIоигъохэми ателъытэгъэщт. Кушъхьэфэ­чъэ гъогужъыер тыралъхьэгъах, лъэсрыкIуапIэм ишIын аублагъ, дэкIояпIэм дэжь зыгъэпсэфыпIэм идэхьапIи зэтырагъэпсыхьэ. Мы­хэм апэчIынатIэу экогъогужъыер, кIэлэцIыкIу джэгупIэр, спортым зыщыпылъыщтхэр, нэмыкI­хэри щашIыщтых.
«Апэрэ чэзыур мы илъэсым къэтыухыщт. Сицыхьэ телъ къэ­лэдэсхэр лъэшэу зэрежэхэрэр зыгъэпсэфыпIакIэм. Мыекъуапэ ипсыхъо нэпкъэу зэтедгъэпсы­хьагъэм къыгъэлъэгъогъах мыщ фэдэ проектхэр республикэм икъэлэ шъхьаIэ щыпсэухэрэмрэ Адыгеим ихьакIэхэмрэ зэрагъэ­федэхэрэр ыкIи зэрящыкIагъэ­хэр», — къыкIигъэтхъыгъ Къум­­пIыл Мурат.