Лъэпкъ Iэпэщысэхэм яшIын пылъхэм я Мафэ фэгъэхьыгъэ Iофтхьабзэ Адыгэ Республикэм исурэт къэгъэлъэгъуапIэ щыкIуагъ. Лъэпкъ Iэ­пэ­Iасэхэм яхудожественнэ IофшIагъэхэр цIыф-хэм алъыгъэIэсыгъэнхэмкIэ хэдыкIыным пыщэгъэ Исае Анжелэ егъэджэнхэр зэхищагъэх.

Исае Анжелэ Адыгеим щызэлъашIэ. Дышъэ хэдыкIыным ишъэфхэр къыткIэхъухьэрэ лIэ­ужхэм аригъэшIэным ар пылъ. Культурнэ кIэным уасэ фашIынымкIэ егъэджэн десэхэм мэхьанэшхо яIэу елъытэ. Адыгэ лъэпкъ Iэпэщысэхэм якъэухъу­мэн ыкIи яхэгъэхъон зэхахьэр тегъэпсыхьэгъагъ.
— ИжъыкIэ адыгэ пшъашъэ­хэр дышъэидэ хэдыкIыным фэIэпэIэсагъэх. Бзылъфыгъэ нахьыжъэу унагъом исхэм щысэ атырахыщтыгъ. Зэхахьэм хэлэ­жьагъэхэр хэдыкIыным ишъэф­хэм ащыдгъэгъозагъэх. Мыщ фэдэ Iофтхьабзэхэр мызэу Мыекъуапэ щыкIуагъ. Дышъэ ыкIи тыжьын хэдыкIыным, лъэпкъ Iэпэщысэхэр шIыгъэнхэм ахэлажьэ зышIоигъомэ япчъагъэ зэрэхахъорэм тегъэгушIо, — къыIуагъ Анжелэ.
IэпэIасэм иIофшIэн зэрифэшъуашэу зэригъэцэкIэщтым мэхьанэшхо реты, ащ охътабэ тырегъэкIуадэ. ИIэшIагъэхэр гъэшIэгъоных: гъэчэрэгъугъэх, зэтедзагъэх, тегъэпкIагъэх. Iэпэщысэхэр зэкIэ шапхъэхэм адиштэу, зэкIужьэу гъэпсыгъэх. Лъэхъанэу тызщыпсэурэм елъы­тыгъэу щыгъынми зызэблихъузэ идэхагъэкIи, зыхэшIыкIыгъэмкIи зэтефыгъэ мэхъу. Сыд фэдэ шъуаши мыщ фэдэ Iэпэщысэхэм къагъэкIэрэкIэщт.
— Адыгэмэ ядышъэ кIэн къэухъумэгъэным, лъэпкъ зэфэшъхьафхэм ар ядгъэшIэным тызэрэхэлажьэрэм гушхуагъэ къытхелъхьэ. Зыныбжь икъугъэ пшъашъэхэм ялъэпкъ культурэ зэрэбаим, зэрэдахэм щыгъозэнхэмкIэ мы Iофтхьабзэм ишIогъэ­шхо къэкIощт, — хигъэунэфыкIыгъ IэпэIасэм.
Лъэпкъ Iэпэщысэр псэущт итарихъ изэгъэшIэн лIэужхэр хэщагъэхэ хъумэ.
Лъэпшъыкъо Фатим.
Сурэтыр авторым ий.