Якъин адэтэгощы
Тхьаумэфэ мафэу кIуагъэр Урысыем ичIыпIэ зэфэшъхьафхэм къащыхъугъэ тхьамыкIагъохэмкIэ тарихъым къыхэнэжьыщт.
Къалэу Севастополь
А мафэм, мэкъуогъум и 23-м, Украинэм идзэхэм къалэу Севастополь къыдэонхэу ракетэхэр къатIупщыгъэх. Урысыем и ПВО ахэр къызыреутэхыхэм, къапызыгъэхэр хыIушъо гъэпсэфыпIэм къыщефэхыхи, цIыфхэм къахэфагъэх.
Севастополь игубернаторэу Михаил Развожаевым тыгъуасэ щэджагъохэм адэжь къызэритыгъэмкIэ, ащ нэбгыритф хэкIодагъ, щыр кIэлэцIыкIух. ПстэумкIи шъобж тещагъэ хъугъэу медицинэ IэпыIэгъу зищыкIагъэ хъугъэр нэбгыри 124-рэ мэхъу, 82-р сымэджэщхэм ачIэлъых.
Украинэм идзэхэм мыщ дэжьым щагъэфедэгъэ ракетэу ATACMS зыфиIорэр США-м къафитIупщыгъэ Iашэхэм ащыщ.
— Киевскэ режимым жъалымыгъэшхо зыхэлъ бзэджэшIагъэ зэрихьагъ, — къыритхагъ АР-м и ЛIышъхьэу КъумпIыл Мурат иинтернет нэкIубгъохэм ащыщ. – Мамыр щыIакIэ зиIэ цIыфэу къалэу Севастополь дэсхэм IашэкIэ къахэуагъэх. Ащ ыпкъ къикIыкIэ нэбгыри 124-мэ уIагъэхэр е шъобж зэфэшъхьафхэр атещагъэхэ хъугъэ, 27-р кIэлэцIыкIух. Нэбгыритфэу хэкIодагъэхэм ащыщэу щыр кIэлэцIыкIух. Адыгеим щыпсэухэрэм ацIэкIэ Севастополь игубернаторэу Михаил Развожаевым ыкIи хэкIодагъэхэм яIахьыл-гупсэхэм сафэтхьаусыхэ. Шъобжхэр зытещагъэ хъугъэхэм бэрэ пэмылъэу япсауныгъэ зэтеуцожьынэу тафэлъаIо. ЗэкIэми тызэдеIэжьзэ пыир къэдгъэуцун, тицIыфхэр къэтыухъумэнхэ ыкIи текIоныгъэр къыдэтхын фае.
Дагъыстан Республикэр
Мы мэфэ дэдэм, пчыхьэм, Дагъыстан икъэлитIумэ, Махачкаларэ Дербентрэ, тхьамыкIагъохэр къащыхъугъ. Ар зиIэшIагъэр террористхэр ары.
Апэ чыристан диным пылъхэм ячылысэу Дербент иурамэу Лениным ыцIэ зыхьырэм тетым бзэджашIэхэр Iашэ аIыгъэу тебэнагъэх. Дин мэфэкIхэм ащыщ хагъэунэфыкIэу нэбгырэ 40 фэдиз а уахътэм ащ чIэтыгъ. Чылысыр къэзыгъэгъунэщтыгъэмрэ протоирееу Николай Котельниковымрэ террористхэм аукIыгъэх. Ащ ыужым джуртхэм ятхьэлъэIупIэ, синагогым, кIагъэнагъ.
А охътэ дэдэм къалэу Махачкала иурамэу Ермошкиным ыцIэ зыхьырэм гъогу-патруль къулыкъум ипостэу тетым террористхэр тебэнагъэх. Дагъыстан Республикэм и ЛIышъхьэу Сергей Мелиховым тыгъуасэ пчэдыжьым къызэриIуагъэмкIэ, къэлитIум тхьамыкIагъоу къащыхъугъэхэм полицием иIофышIэу нэбгырэ 15 ахэкIодагъ. Ахэм ащыщ къалэу Дагестанские Огни полицием иотделэу иIэм ипащэ. Дербент террористхэм зыщапэуцужьхэм уIэгъэ хьылъэу тещагъэ хъугъэхэм апкъ къикIэу ар дунаим ехыжьыгъ. Джащ фэдэу къэлэдэсхэм ащыщэу нэбгырэ 19-мэ уIэгъэ ыкIи шъобж зэфэшъхьафхэр атещагъэхэ хъугъэ.
— Тхьаумэфэ мафэм Дагъыстан Республикэми тхьамыкIагъо къыщыхъугъ, — къытхыгъ Адыгеим и ЛIышъхьэ ащ фэгъэхьыгъэу. — Махачкаларэ Дербентрэ япсэуалъэхэм ащыщхэм террористхэр атебанэхи, жъалымыгъэ зэрахьэзэ, цIыфхэр аукIыгъэх. Адыгеим щыпсэухэрэм ацIэкIэ ыкIи сэ сшъхьэкIэ Дагъыстан и ЛIышъхьэу Сергей Мелиховымрэ хэкIодагъэхэм яунагъохэмрэ сафэтхьаусыхэ. Шъобж хэзыхыгъэхэм псынкIэу япсауныгъэ зэтеуцожьынэу тафэлъаIо. Терроритсхэм Темыр Кавказым зыпкъитыныгъэу, мамыр щыIакIэу илъыр, лъэпкъхэм язэгурыIоныгъэ зэщагъэкъон гухэлъ яI. Дагъыстан, Темыр Кавказым, зэрэ Урысыеу ащыпсэухэрэм зыкIыныгъэ ахэлъыныр, зэкъоуцонхэр ары акIуачIэр. Лъэпкъ зэфэшъхьафыбэ зэрыс тихэгъэгу зэхэпкъутэн плъэкIыщтэп. Мы терактым хэщагъэ хъугъэхэм яфэшъошэ пшъэдэкIыжь зэрарагъэхьыщтым сицыхьэ телъ.
Урысыем СледствиехэмкIэ и Комитет Дагъыстан РеспубликэмкIэ и Къутамэ уголовнэ Iоф къызэIуихыгъ, бзэджэшIэгъэ хьылъэм хэщагъэхэм алъэхъух.
Терактхэм ахэкIодагъэхэм апае мэфищрэ республикэр шъыгъощт.
ШъолъыритIум арысхэм якъин адэтэгощы. ХэкIодагъэхэм ягупсэхэм тафэтхьаусыхэ. Шъобж хэзыхыгъэхэм япсауныгъэ зэтеуцожьынэу тафэлъаIо.
ХЪУТ Нэфсэт.