Урысые олимпийскэ мафэм фэгъэхьыгъэ Iофтхьабзэ­хэр республикэ стадионэу «Зэкъошныгъэм» щыкIуагъэх. Спорт зэнэкъокъухэм Мыекъуапэ щыпсэурэ нэбгырэ 500-м ехъу ыкIи Белгородскэ хэкум илIыкIо 30-м нахьыбэ ахэлэжьагъ.

МэфэкI мафэр флэшмобкIэ рагъэжьагъ. Къэлэ спорт еджэпIитIум защызыгъэсэрэ ныбжьыкIэхэр зыхэлэжьэгъэхэ къэгъэлъэгъонхэр цIыфхэм ашIогъэшIэгъоныгъэх. Джащ фэдэу футболымкIэ кIэлэцIыкIухэр зэнэкъокъугъэх. Iофтхьабзэхэм къадыхэлъытагъэу стритболымкIэ, кикскутерингымкIэ, теннис инымкIэ турнирхэр рагъэкIокIыгъэх. Зипсауныгъэ зыгъэпытэ зышIоигъохэм апае зэхащэгъэ акциеу «Спортым екIурэ лъэбэкъу мини 10» зыфиIорэр мэфэкIым кIэух фэхъугъ. Ащ нэбгыри 130-рэ хэлэжьагъ.
Спорт Iофтхьабзэхэм ахэлэжьагъэхэм зэкIэми Урысыем и Олимпийскэ Комитет идипломхэр афагъэшъошагъэх.