Адыгеим монополием пэ­шIуекIогъэнымкIэ и ГъэIорышIапIэ Общественнэ советым изэхэсыгъо щыкIуагъ. Ащ къыщаIэты­гъэ­хэм ащыщ чъыгхэтэлэ­жьыпIэ­хэм арыт унэхэм газрыкIуапIэхэр ящэлIэгъэнхэм иIофыгъо. Iахьзэхэлъ обществэу «Газпром газо­распределение Майкоп» зыфиIорэм игенеральнэ пащэу ЕкъутэкI Аслъан зыхэлэжьэгъэ зэхэсыгъом мы Iофыгъом игъэкIотыгъэу щытегущыIагъэх.

Ащ къызэриIуагъэмкIэ, Урысые Федерацием и Правительствэ иунашъо диштэу газрыкIуапIэхэр чIыгу Iахьхэм ягъунапкъэхэм ыпкIэ хэ­мылъэу къазыращалIэрэр унэр зэрыт чъыгхэтэлэжьыпIэр газ къызэолIэрэ псэупIэм къыхиубытэ зы­хъукIэ ары.
Урысыем монополием пэшIуекIогъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэр джащ фэдэу рек­ламэм ехьылIэгъэ хэбзэгъэуцугъэми зэхэсыгъом щытегущыIагъэх.
«Урысыем монополием пэ­шIуекIогъэнымкIэ и Федеральнэ къулыкъу пшъэрылъэу къафишIыгъэр агъэцакIэзэ, рекла­мэ пхъэмбгъухэм ягъэуцункIэ ыкIи ягъэфедэнкIэ чIыпIэ зыгъэIорышIэжьынымкIэ къулыкъухэм Iофэу ашIэрэм гъунэ зэрэлъафырэр нахь агъэлъэ­шыгъ», — къытыгъ Урысыем монополием пэшIуекIогъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ.
Рекламэм фэгъэхьыгъэ хэбзэгъэу­цугъэм зэрэщыгъэнэфагъэмкIэ, чIыпIэ зыгъэIорышIэжьынымкIэ къулыкъухэм япшъэрылъ рекламэ пхъэмбгъухэр зыдэщытыщтхэм ясхемэ ухэсыгъэныр ыкIи чIыпIэ зыгъэIорышIэжьынымкIэ къулыкъум официальнэ сайтэу Интернетым щыриIэм ар ригъэхьаныр.
Рекламэ пхъэмбгъухэр зэрагъэуцу­хэрэмрэ зэрагъэфедэхэрэмрэ гъунэ алъафызэ, чIыпIэ зыгъэIорышIэ­жьынымкIэ къулыкъухэм япшъэрылъхэр икъоу агъэцакIэхэ зыхъукIэ, нэкъо­къоным экономикэм мы илъэныкъо зыщиушъомбгъущт, нэкъокъонымкIэ Урысые Федерацием ишъо­лъыр иэкономикэ илъэныкъо зэфэшъхьафхэм пэрыохъуныгъэхэр къащыуцущтхэп.
Адыгеим монополием пэшIуекIогъэнымкIэ и ГъэIорышIапIэ къызэ­ритыгъэмкIэ, чIыпIэ зыгъэIорышIэ­жьынымкIэ къулыкъуитIумэ рекламэ пхъэмбгъухэр зыдэщытыщтхэм ясхемэ агъэхьазырынэу ыкIи аухэсынэу афагъэпытагъ.