СурэтшIыгъэхэм яреспуб­ликэ зэнэкъокъоу «Хэу­шъхьафыкIыгъэ дзэ операциер кIэлэцIыкIухэм анэ­хэмкIэ» зыфиIорэм текIоныгъэ къыщыдэзыхыгъэ­хэм защыфэгушIогъэхэ Iоф­тхьабзэ партиеу «Единэ Россием» общест­веннэ IэпыIэгъумкIэ и Шта­бэу Мыекъуапэ дэтым щыкIуагъ.

Ащ хэлэжьагъ АР-м и Къэралыгъо Совет — Хасэм и Тхьаматэ игуадзэу, Урысыем и ЛIыхъужъэу Цэй Эдуард.
АР-м культурэмкIэ и Минис­терствэ яIэпыIэгъоу ветеранхэм я Урысые общественнэ организацие и Адыгэ республикэ къу­тамэу «Боевое братство» зыфиIорэмрэ дзэкъулыкъушIэхэм я Урысые профсоюз и Адыгэ республикэ организациерэ зэгъусэхэу зэнэкъокъур зэхащагъ.
Мыщ ипшъэрылъыр кIэлэцIыкIухэм дзэ операцием еплъыкIэу фыряIэр, агу щыхъурэ-щышIэрэр яхудожественнэ IофшIагъэхэмкIэ къыраIотыкIын амал яIэныр, джащ фэдэу ахэм яеплъыкIэхэм обществэм анаIэ тырарагъэдзэ­ныр ары. ШIоигъоныгъэ зиIэ пстэуми дзэ хъугъэ-шIагъэр, ягупшысэ чыжьэхэр, зыкIэхъо­псыхэрэр къизыIотыкIырэ сурэт­шIыгъэхэм якъэгъэлъэгъон еплъынхэ амал яIагъ.
Адыгеим культурэмкIэ ыкIи искусствэхэмкIэ иеджапIэхэм ачIэс сурэтышI ныбжьыкIэхэр зэнэкъокъум хэлэжьагъэх. Ащ IофшIэгъэ 40-м ехъу къырахьы­лIагъ, 16-мэ хагъэунэфыкIырэ чIыпIэхэр афагъэшъошагъэх.
— Зэнэкъокъур жъоныгъокIэ мэзэ реным рекIокIыгъ. Нахьыбэ зэрэдгъэшIощтым пае куп пэпчъ чIыпIи 4 щыдгъэнэфагъ. Илъэс 14 — 17 зыныбжьыхэр къызхиубытэхэрэм нахьыбэ зэ­рэхэлэжьагъэм фэшI ащ текIоныгъэ зыфэдгъэшъошэщтхэм чIыпIитф афэдгъэнэфагъ, — къыIуагъ «Боевое братство» зы­фиIорэм ишъолъыр къутамэ ипащэу Алексей Харитоновым.
Мы Iофтхьабзэм къыдыхэ­лъытагъэу медалэу «Урысыем ипатриот» зыфиIоу Давид Овчинниковым къыфагъэшъоша­гъэр Урысыем и ЛIыхъужъэу Цэй Эдуард ритыжьыгъ. Давид зэрэныбжьыкIэ дэдэм емылъытыгъэу, кIэлэ чан, патриотическэ Iофтхьабзэу рекIокIыхэрэм зэкIэми ахэлажьэ, ихэгъэгу фэ­­гъэхьыгъэ орэдхэр дахэу къе­Iох ыкIи зышIэхэрэр «республикэм ишаман» аIозэ еджэх.
ГущыIэр лъигъэкIотагъ Цэй Эдуард. АР-м и ЛIышъхьэ, Къэ­ралыгъо Совет — Хасэм ацIэкIэ къэзэрэугъоигъэхэм ащ шIуфэс къарихыгъ. Зэнэкъокъум хэлэ­жьагъэхэм, ахэм янэ-ятэхэм граждан еплъыкIэ тэрэз зэряIэмкIэ, тизэолIхэу плъыр-стырым хэтхэм яамал къызэрихьэу IэпыIэгъу зэрафэхъухэрэмкIэ тхьашъуегъэпсэу ариIуагъ.
— Къэгъэлъэгъоным гупшысэ гъэнэфагъэхэр сигъэшIыгъэх, IофшIэгъэ къызэрымыкIохэр, сэнаущыгъэр къызхэщыхэрэр къырахьылIагъэх. Ахэм пстэуми унаIэ атебдзыныр яфэшъуаш. Ясюжетхэм лIыхъужъныгъэр къахэщы. ХэушъхьафыкIыгъэ дзэ операцием хэлэжьэрэ тидзэ­кIолI­хэм апсэ емыблэжьхэу ма­фэ къэс тыкъызэраухъумэрэр кIэлэцIыкIухэми ашIэ, ар ясурэтшIыгъэхэм къащыраIо­тыкIыгъ, — хигъэунэфыкIыгъ Цэй ­Эдуард.
ДзэкъулыкъушIэхэм я Урысые профсоюз организацие и ­Адыгэ республикэ къутамэ итхьаматэу Анатолий Назаровым къызэри­IуагъэмкIэ, дзэ операцием хэлажьэхэрэм IэпыIэгъу афэхъугъэным фэгъэхьыгъэ Iофтхьа­бзэу бэмышIэу Москва щыкIуа­гъэм хэлэжьагъэх. Мы зэнэкъо­къум къырахьылIэгъэ сурэтшIыгъищ къахахи ащ зыдахьыгъ.
— Тыгу рихьыгъэ сурэтшIыгъэхэм ащыщэу зыдэсштагъэхэр УФ-м и Къэралыгъо Думэ идепутатэу, дзэм IэпыIэгъу фэхъу­гъэнымкIэ движением итхьама­тэу, генерал-лейтенантэу Виктор Соболевым шIухьафтынэу естыгъэх. Ащ ахэм осэшIу къафи­шIыгъ ыкIи зыкъэухъумэжьынымкIэ Къэралыгъо Думэм ико­митет идэпкъхэм нэпэ­еплъэу зэрэпалъхьащтхэр къытиIуагъ, — къыхигъэщыгъ Анатолий Назаровым.
Зэнэкъокъум хэлэжьагъэхэм зэкIэми дипломхэр, хагъэунэфыкIырэ чIыпIэхэр зыфагъэшъо­шагъэхэм щытхъу тхылъхэмрэ ветеран организациехэм агъэ­хьазырыгъэ шIухьафтын IэшIу­хэмрэ аратыгъэх.
Iэшъынэ Сусан.