Гъыбзэ-нэпсыр тичэщ Iусэу,
Хьэзаб хьылъэм тэ тыкъэхъуи
Ны тхьамыкIэр Iэбэ-лъабэу,
Бгъэшъо пцIанэм тыщипIугъи.
Тыдэ къикIи къащ къопиплIым,
НыбжьыкIитIур зэкIыричи
Кушъэ фабэм хэлъ сабыим
Хьэзаб машIор къытырикIи.
ЧIыпIэ хьылъэм уичъахьыгъэу,
Мыжъо сынэу о укъанэ.
Нэгур кIыфэу, осым фэдэу,
Щагу нэкIым укъыданэ.
Къэумэзхэмэ ошъогу шхъуантIэр
ГушIоу тыгъэр къепсыжьына?
УимыIэжьмэ псэогъу закъор
Лъапсэу уиIэр лъыкIотэна?
Гур нэшхъэеу, нэр джы плъэна?
Плъэ кIэмыкIэу тэ укIона?
НитIур нэпсым ристыкIыпи,
Ежьэ стафэу къэнэжьыгъи.
Iэшъхьэ закъоу, къурэ джашъоу,
Унэ нэкIыр къэоплъыхьэ.
Зышъхьэ закъоу кIыбыр нэкIэу,
Сабый быныр къыплъэханэ.
КIышъо пцIанэр нэпс щыугъэм,
МэшIо бзыйкIэ пхырестыкIы.
Нигъэсыгъэу къупшъхьэ кIоцIым,
Шыблэ машIоу къыщэхъушIэ.
КъэучъыIы. Бжьыхьэр къэкIо.
Псы къиугъэу огур шIоркъы.
КIэшъуикIзэ кIыр къытфэкIо,
Игъо къэсышъ, ар мэгушIо.
Чыиф унэу кIыб ебагъэм
Бгъэнэу телъыр кIэогъэпщы.
Иптэкъуагъэшъ, щыбзэжъ нэдым
Орзэжъ шкъуафэу кIэогъэпщы.
Сыд къэхъугъи, сижьыбгъэжъ!
Унэжъ цIыкIур емыутэкIба!
Зэ зэкIакIуи о Iэсэжьба!
Бын ебэм пIэжъ техыжьба!
Зэ къэгырзы, узыр щышхэу,
Зэ къэхьапщэ, жьыр фимыкъоу,
Зэ къэIасэ, Iэр къыщафэу,
Зэ къыкIащтэ зыфэмIажэу,
ТэмэжъитIур зэкIищыгъэу,
ЗыкъеIэты бжыхьэжъ жьыбгъэм,
Лъэкъожъ кIыхьхэр кIиушкуагъэу,
Зыфырегъэхьы хьакIэу пчыкIэм.
Нэплъэгъу закъуи уримгъафэу,
ПчыкIэр псынкIэу мэкIодыжьы.
Шыблэжъ благъор къэущыгъэу,
Огу шIоркъыр зэхебзыхьэ.
Къегъолъэхышъ огу кIыфышъор,
ЧIылъэм шъабэу къеIушъашъэ,
Зэдыхахьишъ зигъогу занкIэр,
Чэф IаплIыр зэращэкIы.
Ощхым осыр къыкIэлъэкIошъ,
Щагу теплъаджэм зытырехъо.
Ны тхьамыкIэр къэтэджыгъэшъ,
Пчъэблы нэзым пIуаблэр Iуехъо.
Сабый цIыкIухэм афэсакъзэ,
КIэхIэн цыпэр кIеупкIэжьы.
Жьыр фимыкъоу гур кIэзэзызэ,
Хьакужъ лъапсэм ар екIужьы.
Жьыр мэшIуаеу кIыр къэсыгъэшъ,
Губжыгъапэу осыр къепхъы.
Пхъэу къэнагъэр къэмэкIагъэшъ,
Ны тхьамыкIэм ар къеплъыхьэ.
Лъынтфэ одхэм лъыр къащэжъошъ,
ШыкIэпщынэу къэтхьаусхэ,
Нэбзый гъыбзэр зэбгырещышъ,
Пшэсэн стырэу зыкъыуещэкIы.
Лъфыгъэр лъапIэ – гъогур хьылъэ,
Ерагъ дэдэу пшъхьэ охьыжьы.
Сабый быныр о къыппэплъэ,
IаплI шъабэр къыуащэкIы.
Хъэдэн цуакъэр зэкIэтхъыгъэшъ,
Лъэпэ пцIанэр шхъуантIэу къещы.
Къесырэ осыр къэлъэшыгъэшъ,
Лъэс лъагъор чIеухъумэ.
Бын тхьамыкIэр угу о къэкIмэ,
ПхъэIаплI хьылъэр пщэгъупшэжьы.
Лъакъор лъэшэу о къэпIэтзэ,
Къоджэ гъогум утехьажьы.
Нэфсэт цIыкIур о къыуажэшъ,
Шъхьангъупчъэм къеплъышъ Iут.
ТIэкIу шIэ къэсми пшъхьэ оIэтышъ,
Лъэбэкъу пчъагъэр къэолъытэ.
О умакъэ зэхахыгъэшъ,
Гъэтхэ тыгъэу уакъыфепсы.
УишIулъэгъуи джэнэт лъапIэшъ
Ифэбагъи о огощы.
Уибыдзашъоу бгъашъом телъым,
ПсынэкIэчъэу уеIушъашъэ.
IупшIэ шъабэу нэгушъом нэсрэм,
Чъые IэшIур ащ къыреты.
Сыд фишIэна чъыем хэтэу,
Осыцэ стырэу огум къехрэр?
Сыд фишIэна куашъом телъэу,
Хьэзаб машIоу чIылъэм тетыр?
Зэо Iугъом къыпхырэплъышъ
Тыгъэр гъызэ, къытфеплъыхы,
ЧIылэм лъыпысыкIэ зегъэшъокIышъ,
Тыркъо хьылъэм егъэгырзы.
Гугъэ иныр псыхъо кIуачIи,
ПсычIэ мыжъоу псым уепсыхьи,
Псэ зыхэлъыр уичIыгу лъапI
Бгъэгъунэрэр уибын лъапI.
Псыхъор къушъхьэм дэчъэежьа?
МашIор лъэшэп хэт фэIона?
Нарт нитIур къэщынэна?
Нарт IэпшъитIур джы къэпшъына?
Зэ уикIасэр нэм къыкIаплъэ,
Лъыр къыкIэчъэу осым хэлъэу
ЗыкъеIэтышъ къыпIоплъэжьы
Зэхэфэжьы шъхьэр шIозыгъэу.
«ЧIылъэ лъапIэр сэбгынэжьышъ
СишIулъэгъуи лъым щэткIужьы
СичIыгу лъапIэ ным ычIапIэшъ
Шъущымыгъупшэу къэрэнэжь!»
КIуачIэр макIэшъ, гур къэмакIэ,
Заор гъаблэшъ, лъакъор кIэкIрэп.
Шъхьэр къэуназэшъ, узэхафэ
Хьадэгъу чъыем ухелъашъо.
Хэт нэсына уиджэмакъэ?
Хэт фэкIона уитхьэлъэIуи?
Хэт ышIэна уищылъыкIи?
Хэт къэплъэна уалъэныкъуи?
Тыгъэжь жьыбгъэр нахь къэлъэшы
ГухэкI псалъэр къыпфегъэсы.
УипчыхьыпIэ къэшъыпкъэжьы,
Псэогъу лъапIэм уебгынэжьы.
ЧIым ыкIуачIэу умыгъэгъурэм
ПкIэшъхьэ тхьапэу укъеIэты.
КIочIэ шъэфэу къыпхилъхьагъэм
Лъэтемытэу укъехьыжьы.
Iугъо гъогухэр къызэпичзэ,
ПкIыжьыгъэ тхьапэр къыпфахьыжьы.
УлъэIабэшъ пIэ кIэзэзызэ,
Похоронкэр къыуатыжьы.
А къин мафэр мэстэ лъыгъакIэу
ГъашIэм итыркъоу кIышъом къытенэ
Чатэр шIэтэхэу, лъыпсэр къечъэхэу,
Гуих мэхъаджэу уахътэм щеIэты.
Пшъо зэокIышъ, бжыхьэ чъэп чъыIэу,
Шъэф гухэкIэу ар огъэежьы.
Сабый Iэ цIыкIухэм пIапэ аIыгъэу,
Бгъэнышъхьэ унэм о уращэжьы.
Илъэс къинхэр хъотым зэрихьэу,
ТичIыгу лъапIэ нэпсыр текIыжьы.
Тибыракъ плъыжьы лъыпсэр къыпы­чъэу
ТекIоныгъэ лъапIэр тэ къытфыдахы.
Сянэ сIомэ, миллион пчъагъэу
Зэошхом ибжьэ апшъэ дэлъыгъ
Сянэ сIомэ, ащ имызакъоу,
ЗыIапшъэу, зылъапшъэу зэдэбэнагъ.
Тянэхэр сIомэ, ялIыблэнагъэ
Къэстхын слъэкIынэу сижабзэ къымыхь
Тянэхэр сIомэ, ялэжьэкIагъэ
Къысфэмыухэу сыкъызэIуехь.
Хьэзаб къинэу ныхэм ащэчыгъэр
Щэчалъэ щыIэу хэт къыгъотына?
Хьэзаб тхьамыкIагъоу апшъэ дэлъыгъэр
Ар къылъытэнэу хэт фэлъэкIына?
КъегъэжьапIэ зиIэм, кIэух иIэнба?
Хъишъэу апылъыгъэр хэт фэухына?
Ным игонахь анахь лъапIэба?
ДахэкIэ, дэгъукIэ тыгу къэрэкIыжь!
Iэшъынэ Юныс.
IофшIэным иветеран.
Гъобэкъуай.