Мыекъуапэ зыфегъэхьазыры
Я XXXV-рэ Урысые олимпийскэ мафэм ихэгъэунэфыкIын Адыгеим икъэлэ шъхьаIэ зыфегъэхьазыры. Ащ изэхэщакIох АР-м и Олимпийскэ Советрэ Мыекъуапэ физическэ культурэмкIэ ыкIи спортымкIэ и Комитетрэ.
Спорт Iофтхьабзэу зэхащэщтхэм янахьыбэр мэкъуогъум и 23-м республикэ стадионэу «Зэкъошныгъэм» щыкIощт. МэфэкIыр пчэдыжьым сыхьатыр 8-м кIэлэцIыкIу щагу командэхэм язэнэкъокъукIэ аублэщт. Нэужым Мыекъуапэ испорт еджапIэхэм ачIэс кIэлэцIыкIухэр зыхэлэжьэщтхэ флешмоб рагъэкIокIыщт, джащ фэдэу стритболымкIэ заушэтыщт, экстремальнэ спорт лъэпкъхэм яфестиваль, зипсауныгъэ зыгъэпытэ зышIоигъохэм апае Iофтхьабзэу «Спортым екIурэ лъэбэкъу мини 10» зыфиIорэр зэхащэщтых. «IофшIэным ыкIи зыкъэухъумэжьыным сафэхьазыр» зыфиIорэм къыдыхэлъытэгъэ шапхъэхэм ятын мэкъуогъум и 23-м аухыщт. Теннис цIыкIумкIэ кIэлэеджакIохэм азыфагу щызэхащэгъэ команднэ первенствэм изэфэхьысыжьхэр ашIыщтых. Спорт Iофтхьабзэхэм ахэлажьэхэрэм зэкIэми Урысыем и Олимпийскэ Комитет идипломхэр афагъэшъошэщтых.