Зэдегъэштэн есынымкIэ Къыблэ федеральнэ шъолъырым ипервенствэ къалэу Таганрог щыкIуагъ. Адыгеим ыцIэкIэ ащ хэлэжьагъэх къэлэ спорт еджапIэу N 2-м илIыкIохэр. Хабзэ зэрэ­хъугъэу, типшъа­шъэхэм ухьазырыныгъэ дэгъу къагъэлъэ­гъуагъ, медалих къахьыгъ.

Спорт зэнэкъокъум зыщаушэтыгъ Адыгеим, Донецкэ Народнэ Республикэм, Севастополь, Къырым, Ростовскэ ыкIи Волгоградскэ хэкухэм, Краснодар краим яспортсмен­кэхэм.
Тыжьын медальхэр къафагъэшъошагъэх Лъэустэн Бэллэ, Маруся Григоренкэм ыкIи Дана Мироновам. Нэбгырэ тIурытIу хъухэрэм язэнэкъокъухэм республикэм илIыкIохэм медалищ къащахьыгъ. ТекIоныгъэр къыда­хыгъ Къохъужъхэу Бэллэрэ Мадинэрэ, Каролина Крицкаямрэ Аниса Каташевамрэ. ЯтIонэрэ чIыпIэр къахьыгъ зэшыпхъухэу София ыкIи Стефания Колисниченкэхэм.
ХагъэунэфыкIырэ чIыпIэхэр къыдэзыхыгъэхэр зыгъэхьазырыгъэхэр Урысыем спортымкIэ имастерэу, тренер-кIэлэегъаджэу Иван Говорковымрэ спортсмен-инструкторэу Софья Водяникрэ.