Хьатыгъужъыкъое гурыт еджапIэм къыщызэIуахыгъэ гъэмэфэ лагерым гъэшIэгъонэу яIофшIэн щызэхащэ.

Темзэкъо Маринэ анахь кIэлэегъэджэ ныбжьыкIэу еджапIэм Iутхэм ащыщ. Ащ лагерым къэкIорэ кIэлэцIыкIумэ адыгабзэм фэгъэхьыгъэ Iофтхьабзэхэр мафэ къэс афегъэхьазыры. КIэлэеджакIохэр ягуапэу ахэм ахэлажьэх.
ЕджакIохэм, хабзэ зэрэхъугъэу, пчэдыжьыр зарядкэкIэ — пкъыр псыхьэгъэ­нымкIэ — рагъажьэ, зышхэхэрэм ыуж джэгун-егъэджэн Iофтхьабзэхэр аублэ. Ахэм зэкIэри ахэлажьэх, зэрагъэшIэгъэ десэхэмкIэ заушэтыжьы, дэгъоу зыкъэзыгъэлъэгъуагъэхэм щытхъу тхылъхэр аратых. Егъэджэнхэм анэмыкIэу ныбжьыкIэхэм Iофтхьэбзэ зэфэшъхьафхэр Маринэ афызэхещэх. КъыткIэхъухьэрэ лIэужхэм я Хэгъэгу шIу алъэгъоу, Iэдэб ахэлъэу, гъэсагъэхэу хъунхэм яублапIэр унагъомрэ еджапIэмрэ. Ар къыгурыIозэ, кIэлэегъаджэм иIофшIэн кIэлэеджакIохэри ны-тыхэри къыхегъэлажьэх.
«Адыгэ макъэр» а зыгъэпсэфыпIэм зыкIогъэ мафэм лъэпкъым икультурэ нэIуасэ уфэзышIырэ Iофтхьэбзэ зэфэшъхьафхэр зэхащагъэхэу тытефагъ.
— 2016-рэ илъэсым къыщегъэжьагъэу еджапIэм сыщэлажьэ. Адыгабзэм фэгъэ­хьыгъэ Iофтхьабзэхэр адыгэ кIэлэцIыкIу къодыехэр арэп зышIогъэшIэгъонхэр, нэмыкI лъэпкъ къыхэкIыгъэхэри ягуапэу ахэм къахэлажьэх. Непэрэ мафэм социальнэ хъытыум кIэлэеджакIохэр къы­хэтщынхэ пшъэрылъ тиI. Адыгэ шъуашэм фэгъэхьыгъэ арт-фестиваль, спектаклэу «ШIу шIи псым хадз», квест-зэнэкъокъоу «Нарт эпосым илIыхъужъхэр» «Адыгэ хабзэу тэ тиIэр джащ фэд», «Сэтэнэе гуащэм ихьакIэщ» редгъэкIокIыгъэх, непэ «Адыгабзэм хэт фэIаз?» зыфиIорэр афызэхэтэщэ. Непэрэ зэнэкъокъум бзэм изэгъэшIэн, жабзэм ихэгъэхъон фэIорышIэу дгъэпсыгъэ,— къеIуатэ Маринэ.
Адыгэ къуаем ыкIи хьалыжъом афэгъэхьыгъэ зэнэкъокъоу ыпэрэ мафэм щыIагъэм игугъу кIэлэцIыкIухэм къытфа­шIыгъ. Дышъэидэным итарихъ пшъэшъэ­жъыехэм агу рихьэу къытфаIотагъ, джыри еджапIэм тыкъеблагъэмэ ащ ихэдыкIын ишъэфхэр тагъэшIэнэу къытаIуагъ.
Хьатыгъужъыкъое гурыт еджапIэм ипащэу Шъаукъо Фатимэ зыIудгъэкIагъ.
— Непэ, анахь тызыгъэгумэкIырэ Iофыгъохэм ащыщ ныдэлъфыбзэм изытет. КIэлэцIыкIоу адыгабзэм рыгущыIэхэрэм япчъагъэ нахь макIэ мэхъу. Тягупшысэ ныдэлъфыбзэр нахь игъэкIотыгъэу зыщыдгъэфедэщт Iофтхьабзэхэм. Ащ Темзэкъо Маринэ чанэу къыхэлажьэ. Бзэр зыIумылъым, епIорэр къызгурымыIорэм сыдэущтэу удэлэжьэщта? ЛъэныкъуитIуми — ны-тыхэми, кIэлэегъа­джэхэми тызэгъусэу мы Iофым тишъыпкъэу тыкъекIолIэн фае. АдыгабзэкIэ зэхащэрэ зэхахьэхэр нахьыбэу, еджа­кIохэм апае Iофтхьэбзэ зэмылIэужыгъоу зэшIуахыхэрэм адыгабзэр ахэгъэщагъэу, атхьакIумэ ит зэпытэу, тыди адыгабзэр щыIоу, ныбжьыкIэхэри ащ кIэгушIухэу шIыгъэн фае. А Iофым зэкIэ къыхэлажьэмэ, шIэныгъэ бай къыкIэкIощт, бзэм фэIэзэ лIэужыкIэ тиIэщт, — къыIуагъ Шъаукъо Фатимэ.
КIэлэцIыкIу художественнэ литературэм еджакIохэр нэIуасэ фашIыныр, адыгэ культурэм, лъэпкъым игушъхьэлэжьыгъэ пIуныгъэ кIуачIэу ахэлъыр кIэлэцIыкIумэ алъыгъэIэсыгъэныр пшъэ­рылъэу еджапIэм зыфегъэуцужьы.
— ЗэкIэми адыгабзэр къяшIэкIыгъэнэу сыфай. КIэлэеджакIохэм ядунэееплъыкIэ зызэриушъомбгъущтым сыпылъ, — хигъэунэфыкIыгъ Маринэ.
Гъэсэныгъэм исистемэ къыдыхэлъытэгъэ егъэджэгъу сыхьатхэм анэмыкIэу, адыгагъэм, адыгэ культурэм язэгъэшIэн уахътэ къафыхагъэкIыным мэхьанэшхо иI. Ащ тикIэлэегъаджэхэр фэхьазырых, дэлажьэх, ныдэлъфыбзэр, культурэр зэрарагъашIэрэм дакIоу джэгукIэхэмкIэ бзэм хащэх.
Лъэпшъыкъо Фатим.
Сурэтыр: Iэшъынэ Аслъан.