Культурэ кIэным хахьэхэрэр
Адыгэ Республикэм икультурэ кIэн ипсэолъэ 300 фэдизмэ якъэбар амыгъэкощырэ мылъкум икъэралыгъо реестрэ зыкI хагъэхьагъ. Ащ ишIуагъэкIэ а чIыпIэхэр зыдэщыIэхэмрэ ахэм ягъэфедэн епхыгъэ къэбарымрэ игъом зышIоигъо пстэуми къызIэкIагъэхьан алъэкIыщт.
Мы илъэсым ижъоныгъокIэ мазэ реестрэм джыри кIэу хэхьагъэх культурэ кIэным къыхиубытэрэ псэолъэ 15. Ахэм зыкIэ ащыщ республикэ мэхьанэ зиIэ «ПивэшI заводыр».1882-рэ илъэсым ашIыгъэ унэр зэрэзэтырагъэпсыхьажьыгъэм ишIуагъэкIэ джы къызынэсыгъэм архитектурнэ теплъэу иIэр зэблэхъугъэ хъугъэп. Адырэ къыпашIыхьэгъэ унэри ащ диштэу агъэпсыгъ.
Джащ фэдэу «Пушкиным и Уни (Филармониер)» реестрэм хагъэхьагъ. Унэр 1985-рэ илъэсым ашIыгъагъ. Зэфэсхэм я УнэкIэ еджэнхэу ары апэ зыфэягъэхэр. Джы ащ зэреджэхэрэр Адыгэ Республикэм и Къэралыгъо филармоние. Псэуалъэм квадрат метрэ мин 12-м ехъу еубыты. Концерт залышхуи (тIысыпIэ 800), зал цIыкуIи (тIысыпIи 100) хэтых, ащ нэмыкIэу Къэралыгъо филармонием имузей, репетициехэр зыщашIырэ залхэр, макъэр зыщытыратхэрэ студиер хэтых.
Джащ фэдэу республикэ мэхьанэ зиIэ псэуалъэхэу культурэ кIэным жъоныгъуакIэм хагъэхьагъэхэм ащыщых «Пожарнэ къэплъыхьапIэр», «Апэрэ къэлэ почтэм иунэ», «СатыушIэу Терзиевым иунэ (къалэу Мыекъуапэ иадминистрацие хэгъэгу кIоцI IофхэмкIэ и ГъэIорышIапIэ)», «Ермэл чылысыр (КъокIыпIэм щыпсэурэ лъэпкъхэм ямузей икъутам)», «Чылысым иIофышIэхэм я Ун кIэлэцIыкIу ибэхэр ыкIи ны-тыхэр зышъхьарымытыжьхэр зыщаIыгъхэрэ хэушъхьафыкIыгъэ кIэлэцIыкIу унэу я VIII-рэ купым хахьэрэр)».
Хэбзэгъэуцугъэм къызэриIорэмкIэ, культурэ кIэным ипсэуалъэ зыдэщыт чIыпIэм псэолъэшIыным, чIыгу тIыным ыкIи нэмыкIхэм япхыгъэ IофшIэнхэу ахэм зэрар къафэзыхьын зылъэкIыщтхэр ащагъэцакIэхэ хъущтэп.
А чIыгу Iахьыр шъолъырэу къагъэгъунэрэм хахьэмэ е хэмыхьэмэ псынкIэу зэжъугъэшIэн шъулъэкIыщт Росреестрэм исервисэу «Публичная кадастровая карта» зыфиIорэр къызфэжъугъэфедэмэ.
Мыхэм зафэжъугъазэми хъущт:
— МФЦ-м иофисхэм;
— электрон шIыкIэм тетэу къэралыгъо фэIо- фашIэхэмкIэ порталым;
— Роскадастрэм илIыкIохэр шъуадэжь къэкIонхэмкIэ амал гъэнэфагъэу щыIэхэри къызыфэжъугъэфедэнхэ шъулъэкIыщт.
Росреестрэм телефон фэIо-фашIэхэмкIэ и Ведомствэ тел. 8-800-100-34-34-кIэ шъутеоми хъущт.