Мыекъуапэ щыпсэухэрэм гъэ­рекIо амакъэ зыфатыгъэу «ТекIоныгъэм ия 55-рэ илъэс» зыфиIорэ бульварым игъэкIэ­жьын ыкIэм фэкIо.

Партийнэ проектэу «Iэрыфэгъу къэлэ щыIакIэм игъэпсын» зыфиIорэм къыды­хэлъытэгъэ лъэпкъ проектэу «ПсэупIэр ыкIи къэлэ щыIакIэр» зыцIэм къыхиубытэу IофшIэнхэр рагъэ­кIокIых.
ГъэкIэжьын Iофхэр зэрэкIохэрэм тыгъуасэ зыщигъэгъозагъ Мыекъуапэ ипащэу Геннадий Митрофановым. Ащ къызэриIуагъэмкIэ, АР-м и ЛIышъхьэу КъумпIыл Мурат пшъэрылъ къыгъэуцугъ бульварым ыубытырэ чIыналъэр шIуагъэ нахь къызэритыщтым тегъэпсыхьагъэу агъэфедэнэу, къэкIыхэрэр къызэтырагъэнэнхэу ыкIи фонтаныжъэу тетхэр кIэ­хэмкIэ зэблахъунхэу.
«ЧIыпIэм итеплъэ лъэшэу зэхъокIы: пкъэухэмрэ рыкIуапIэхэмрэ тырахыжьыгъэх, къызщыпкIухьашъущт гъогухэм ателъхэр кIэхэмкIэ зэблахъугъэх, зыщыбгъэпсэфынымкIэ Iэрыфэгъу хъущт псэуалъэхэр къыдэуцуагъэх. КIэлэцIыкIу джэгупIэр шIэхэу къаухыщт, къэкIхэрэр джыри щагъэтIысхьащтых, фонтанхэм яIофшIэн зэтырагъэуцощт, нэмыкI псэуа­лъэхэри къыдагъэуцощтых. Джащыгъум мы чIыпIэр хьазырэу плъытэн плъэкIыщт», — къыIуагъ муниципальнэ псэупIэм ипащэ.

Джащ фэдэу ащ къыхигъэщыгъ культурнэ кIэнымрэ зэтырагъэпсыхьэгъэ псэуалъэхэмрэ афэсакъынхэ зэрэфаем иIофыгъо анахь шъхьаIэхэм ащыщэу къызэрэнэжьырэр.
Къэлэдэсхэм ащыщхэм тетIысхьапIэхэр акъутэх, къухьэлъатэр зытетым фэсакъыхэрэп, уцыупхъугъэ хьасэхэм ахэтых, фонтан оборудованиеми нэсых. Общественнэ рэхьатныгъэр къэухъумэгъэным пае зыгъэпсэфыпIэм видеокамерэхэр щагъэуцугъэх, нэгухэм ягъэунэфын амали ахэм яI.
«ЗыгъэпсэфыпIэм фэсакъынхэу кIэлэ­цIыкIухэм янэ-ятэхэми, ныбжьыкIэхэми сыкъяджэ. Къухьэлъатэм исаугъэт зытет псэуалъэм сабыйхэр дэшъумгъэкIуаех, къыщяшъумгъэчъыхь, уцхэмрэ къэгъагъэ­хэмрэ къызщыкIыхэрэ хьасэхэм самокат­хэмрэ кушъхьэфачъэхэмрэкIэ ахэшъум­гъахьэх. Фонтаными шъуфэсакъ — псыр къызэрыкIырэ чIыпIэхэр зэпяшъумгъэубытыкI — ар щынэгъончъэп ыкIи оборудованием иягъэ регъэкIы. Зэдэдгъэфедэрэ чIыпIэм, зэдытиIофым тыфэсакъы зыхъукIэ ары ныIэп дэхагъэр охътэ кIыхьэм зытыухъумэшъущтыр», — за­къыфигъэзагъ Мыекъуапэ щыпсэухэ­рэмрэ ихьакIэхэмрэ Геннадий Митрофановым.
Мыекъопэ къэлэ администрацием ипресс-къулыкъу