ЧIэхьагъу лъэхъаныр непэ аублагъ
Апшъэрэ еджапIэхэм чIэхьагъу лъэхъаныр непэ аублагъ. ЗыкI къэралыгъо ушэтынхэм язэфэхьысыжьхэмкIэ ыкIи апшъэрэ еджапIэм иушэтынхэр зытхэрэмкIэ ар бэдзэогъум ыкIэм нэс кIощт.
АКъУ-м лъэныкъо 47-кIэ мыгъэ еджакIохэр ыштэщтых. ПстэумкIи программиплIыкIэ Iоф ышIэщт: бакалавриатыр, специалитетыр, магистратурэр ыкIи аспирантурэр. 2024 — 2025-рэ илъэс еджэгъумкIэ бюджет чIыпIэ 762-рэ ыгъэнэфагъ. Ащ щыщэу 132-р — целевоих, 163-р — хэушъхьафыкIыгъэх.
— Целевой чIыпIэхэм шъхьафэу ягугъу пшIын фай. Апшъэрэ еджапIэм IофшIапIэм зэзэгъыныгъэ дешIышъ, IофшIакIохэр фегъэхьазырых. Еджэныр макIофэ хъызмэтшIапIэр ныбжьыкIэхэм IэпыIэгъу къафэхъу ыкIи икIэухым лэжьэпIэ чIыпIэ къареты. Илъэси 3-м къыщегъэжьагъэу 5-м нэс ныбжьыкIэр IофшIапIэм Iутын фае, — къеты АКъУ-м ипресс-къулыкъу.
Джащ фэдэу пэIудзыгъэ шIыкIэкIи АКъУ-м учIэхьанымкIэ тхьапэхэр бгъэхьынхэ плъэкIыщт. «Поступление в ВУЗ онлайн» зыфиIорэр «ГосуслугэхэмкIэ» къызфэбгъэ-
федэн плъэкIыщт, е АКъУ-м ихъытыу нэкIубгъохэу «https://www/fdygnet/ru», «https://agubel/ru» зыфиIохэрэм тхылъхэр бгъэхьышъущт. СэнэхьатитфымкIэ шIоигъоныгъэр къэбгъэлъэгъошъущт, анахьэу узыфаер пчъагъэу пыптхэрэмкIэ бгъэнэфэнэу амал щыI. ЧIэхьан шIоигъоныгъэ зиIэхэм ятхьапэхэм яугъоин бэдзэогъум и 20 — 25-м АКъУ-м щыкIощт.
МКъТУ-ми чIэхьагъу лъэханыр ригъэжьагъ. Гурыт сэнэхьат ягъэгъотыгъэнымкIэ, бакалавриатымкIэ, специалитетымкIэ, магистратурэмкIэ, ординатурэмкIэ ыкIи аспирантурэмкIэ зэхэтэу лъэныкъуи 100 фэдизкIэ ащ мыгъэ еджакIохэр ыштэщтых. Мы илъэс еджэгъумкIэ ащ бюджет чIыпIэ 1126-р иI: 295-р — гурыт сэнэхьат гъэсэныгъэмкIэ, 515-р — бакалавриатыр, 188-р — специалитетыр, магистратурэр — 98-рэ, ординатурэр — 23, 7-р — аспирантурэр. Апшъэрэ еджапIэм иунэ шъхьаIэрэ ыкIи ащ икъутамэу Яблоновскэм дэтымрэ тхылъхэм яугъоин ащыкIощт. Тхьаумафэм нэмыкIэу адырэ мафэхэм зэкIэм, пчэдыжьым сыхьатыр 9-м къыщегъэжьагъэу тхьапэхэр зыштэрэ купхэм Iоф ашIэщт. Шэмбэтыр гъэкIэкIыгъэщт: 9-м щыублагъэу 12-м нэс. УпчIэ зиIэхэр priemkom@mkgtu.ru зыфиIорэм тхэнхэ, е телефон номерэу 8(8772) 52-30-08 теонхэ алъэкIыщт.
Анцокъо Ирин.