Мэкъуогъум и 18-м къыщегъэжьагъэу Кавказ заповедникым ия 30-рэ лъагъоу «Къушъхьэхэм зэпырыкIэу хым екIурэм» къыдыхэлъытэгъэ гъогууанэхэм ащыщэу «N30Б» зыфиIорэр зэрэщытэу къызэIуахыжьыгъ. НэмыкIхэм джыри икъоу Iоф ашIэгорэп, лъагъохэм якIуни зэхъокIыныгъэхэр фашIыгъэх. Гъозэрыплъэ ыкIи Ермэл зэпырыкIыпIэхэм ащыкIорэ гъэцэкIэжьын IофшIэнхэр ащ иушъхьагъух. Ощх-шIой зэхэлъэу къехыгъэм ыкъутэ­гъэ лъэсрыкIо лъагъом изэтегъэуцожьын джырэкIэ дэлажьэх.
Ащ елъытыгъэу къушъхьэм зэпырыкIэу хым кIон мурад зышIыхэрэр лъагъом игъэпсыкIэ икъоу нэIуасэ зыфашIыным Кавказ заповедникым иIофышIэхэр къыфэджэх.
— Псынэдахэ блэкIэу Фыщт екIурэ гъогууанэм, Гъозэрыплъэ ыкIи Ермэл зэпырыкIыпIэхэм уарымыкIоу, Лъэгъонэкъэ кордоным къыщегъэжьа­гъэу унэсыни къэбгъэзэжьын плъэкIыщт.
— Ланчъэ гъэхъунэм пхырыкIырэ лъагъом рыкIощтхэм «Инструкторская щель» зыфиIорэмкIэ агъэзэни Фыщт — Ошъутен уцупIэм пхырыкIхэу Фыщт екIолIэнхэ фае.
— Лъагъохэу N 30А, N 30Г зэфэшIыпIагъэх.
Ахэр псауныгъэмкIэ щынагъох, арышъ, зекIохэр атемыхьанхэу заповедникым иIофышIэхэр къяджэх. Джащ фэдэу мыдаIохэрэм тазырхэр къяжэх.
Анцокъо Ирин.
Сурэтыр: Кавказ заповедникыр.