Адыгэ къэралыгъо университетым инджылыз филологиемкIэ кафедрэм ипрофессорэу Сусанна Макеровар Китай щыIэ урысые шIэныгъэлэжьхэм я Ассоциацие ицIыф гъэшIуагъэ хъугъэ. Ащ игъэIорышIапIэ итхьаматэу Алина Стеблянскаям Сусаннэ а цIэ лъапIэр къэзыушыхьатырэ сертификатыр къыритыжьыгъ.

Сусаннэ филологие шIэныгъэхэмкIэ доктор, профессор, Адыгэ къэралыгъо университетым инджылыз филологиемкIэ икафедрэ ипащ, экспериментальнэ лингвистикэмкIэ лабораторием иIэшъхьэ­тет, дизайнер-модельер, модэм и Лабораториеу «SuzieMFashionLAB» зыфи­Iорэр зэхищагъ ыкIи икреативнэ пащ.
Китай щыщ иIофшIэгъухэм къызэрэра­гъэблэгъагъэм тетэу ар Харбин лекцие къыщеджагъ. Ащ шъхьэу иIагъэр: «Этномодэр. Цифрэ лъэхъаным культурнэ маркерхэм якъэухъумэн». ЗэIукIэм изэхэщэкIуагъэх Китай щыIэ урысые шIэныгъэлэжьхэм я Ассоциацие, урыс клубэу Харбин щыIэр ыкIи мы къалэм щеджэхэрэ урыс студентхэм я Ассоциацие, цифрэ гуманитар технологиехэмкIэ шIэныгъэ-ушэтыпIэ Хэйлунцзянскэ университетыр.

Непэрэ мафэм модэр щыIэныгъэм, культурэм, общественнэ еплъыкIэм игъэпсын ахэлажьэ. Ащ фэдэ гукъэкIхэр гупчэ закъор арэп шъолъырхэу шэн-хэбзэ хэушъхьафыкIыгъэ­хэмкIэ къахэщыхэрэм ащыпхыращынхэ алъэкIы.
Сусаннэ къызэриIуагъэмкIэ, лъэпкъ модэр классическэ екIолIакIэм зиушъомбгъуным бэкIэ нахь фытегъэпсыхьагъ.
— Этномодэр зы чIыпIэм имыкощыкIырэ шапхъэу щытэп, ыпэрапшIэу лъэпкъыбэ зыщыпсэурэ Урысыем идизайнерхэм янепэрэ екIолIакI. Проектэу «Этномодэр» Урысыем ыкIи хэгъэгубэхэм язэмылIэужыныгъ. ТэркIэ ащ фэдэ зэхъокIыныгъэхэр зыщытшIышъухэ­рэр Кавказыр ары, — къыхигъэщыгъ Сусанна Макеровам.
АКъУ-м культурэм ифестивальхэу, дизайнер ныбжьыкIэхэм язэнэкъокъоу «Этномодэм» ыкIи нэмыкIхэу Урысыем, IэкIыб къэралыгъохэм ялIыкIохэм щыщ­хэр зыхэлажьэхэрэм къакIэлъыкIуагъ непэрэ Iофтхьабзэу зэрахьэхэрэри. 2024-рэ илъэсым акъылым ыкIи бзэм я Гупчэрэ АКъУ-м иэкспериментальнэ лингвистикэ илабораториерэ Дунэе зэнэкъокъу зэхащэ. Ащ ипшъэрылъыр художественнэ шапхъэр къыхэхыгъэ­ныр, когнитивнэ лъапсэр нэрылъэгъухэм­кIэ гъэпсыгъэныр.
Тарихъ кIэн баим изэгъэшIэн IэпэIэсэ­ныгъэ зыхэлъ мастерхэр, сурэтышIхэр, дизайнерхэр къещэлIэгъэнхэр, лъэпкъ Iэмэ-псымэмэ зафэбгъэзэныр ыкIи лъэпкъ кIэныр гъэкIэжьыгъэныр, цифрэ лъэпкъ модэм ишапхъи зэрахэтэу — а зэпстэумэ культурэм ныбжьыкIэхэр нахь пэблагъэ ашIы, лIэшIэгъу пчъагъэхэм къахэкIыгъэ шэн-хабзэхэм ялъыгъэкIотэн фэIорышIэ.
— Непэ тэ шIэныгъэу тIэкIэлъымкIэ тадэгуащэ, тапэкIэ зэшIотхыщт пшъэры­лъыкIэхэр тэгъэуцух, джащ пае лъэныкъо зэфэшъхьафхэмкIэ зэдэлэжьэны­гъэу тиIэр тэгъэпытэ, — къыIотагъ профессорым.
Адыгэ къэралыгъо университетым ипресс-къулыкъу