«Шъо зэфэшъхьафхэм яфестиваль» ыкIи «Сабынтхъурбэ джэгунхэр» зыфиIорэ Iофтхьабзэхэр Лениным ыцIэ зыхьырэ гупчэм мы зыгъэпсэфыгъо мафэхэм щыкIуагъэх. КIэлэцIыкIухэмрэ ныбжьыкIэхэмрэ я Дунэе фестиваль-зэнэкъокъоу «Адыгеим ижъогъожъыехэр» зыфиIорэм лъыпыдзагъэу ахэр зэхащагъ.

Нэщх-гущхыгъэрэ, джэнэ фыжьырэ — джары ищыкIэгъагъэр шъо зэфэ­шъхьафхэм яфестиваль ухэлэжьэным пае. Зэхахьэр зэщтегъэу джэгукIэ шъуа­шэм илъэу рагъэкIокIыгъ. КIэлэцIыкIу­хэм зыщычэфыщтхэ Iофтхьэбзэ гъэшIэгъонхэр къыдыхэлъытагъэхэу агъэпсыгъ. Мыекъуапэ щыпсэухэрэм ыкIи «Адыгеим ижъогъожъыехэм» яфестиваль къеб­лэгъэгъэ нэбгырэ мин фэдиз ащ хэлэ­жьагъ. Iофтхьабзэм изэхэщакIохэм пшъэрылъ шъхьаIэу яIагъэр гъэмэфэ зыгъэпсэфыгъо уахътэм кIэлэцIыкIухэр, хьакIэхэр ыкIи ны-тыхэр агъэчэфынхэр ары.
Ошъогур шъо зэфэшъхьафхэмкIэ гъэ­кIэ­рэкIагъэу, пщэсыр цIыфхэм ашъхьащытыгъ. Зэпыугъо уахътэм орэд дахэхэр къырагъаIощтыгъэ, къэшъуакIохэм алъэкI къагъэнагъэп.
Адыгэ Республикэм лъэпкъ культурэмкIэ и Гупчэ ипащэ игуадзэу Анцокъо Фатимэ къызэриIуагъэмкIэ, «Ады­геим ижъогъожъыехэр» зыфиIорэ фестивалым Iофтхьабзэр къыкIэлъыкIуагъ. «Шъо зэ­фэшъхьафхэм яфестиваль» хэлэжьагъэ­хэм ащыщхэм Тыркуем кIонхэу путёвкищ зэхэща­кIохэм къаратыгъ. НыбжьыкIэхэм ныб­джэгъуныгъэ азыфагу илъыным, нэIосакIэхэр ашIынхэм Iофтхьабзэхэр фэ­IорышIагъэх. «Сабынтхъурбэ джэгунхэр» зыфиIорэмкIэ зэхахьэр аухыгъ.
— Фестивальхэм язэхэщакIохэм инэу тызэрафэразэр къыхэзгъэщмэ сшIоигъу, Iофтхьабзэр окIофэ ахэр сыд фэдэрэ лъэныкъокIи IэпыIэгъу къытфэхъу­гъэх, тикуп анаIэ къытырагъэтыгъ. Сэри сипшъашъи нэIоса­кIэхэр тшIыгъэх. Фестивалыр шIукIэ тыгу къинэ­жьыщт, — къыIуагъ Ингушетием щыщ Сарэ.
КъыткIэхъухьэхэрэм япIун зыгуи зыпси хэзылъхьэхэрэ АР-м культурэмкIэ и Ми­нистерствэрэ Лъэпкъ культурэм и Гупчэрэ яIофышIэхэм тазэрафэразэр непэ джыри зэ хэдгъэунэфыкIы тшIоигъу.
Лъэпшъыкъо Фатим.
Сурэтыр авторым ий.