Шъэожъые гушIубзыу цIыкIоу илъэси 5 – 6 зыныбжьым ябынхэр Шамик зэреджэхэрэр. ЫцIэ шъыпкъэр Щамил. Сабый пстэумэ зэряшэнэу, зэкIэ ышIэ­мэ шIоигъу, упчIэрый. Нэф къы­зышъэу чэщ зыхъурэм нэс­кIэ унэм исхэм упчIэ зэпымыужьыр аретэкъулIэ. АщкIэ анахь «тхъэжьыхэрэр» янэжърэ ятэжърэ, хъупхъэ дэдэр инэ­нэжъ.
Зы мэфэ уае горэм Шамикрэ инанэрэ унэм зэдисынхэу хъугъэ. Джэгуни, щхыни, пкIэни, лъэни, шхэни къытенагъэп. Къещхыми, бэдзэогъу гопэгъу фэбэшхуагъ. Шамики тIэкIыхьэгъэ цIыкIути, ыпшъэ илъ тхылъ тхыгъэр ежь-ежьырэу ынэ къы­пэшIофагъ:
— Нан. Нан, сыд пIуагъа мы спшъэ илъыр, къы­сэIожьи зэ? — Ишъып­къэ дэдэу янэжъ елъэIу. Къом ыкъо цIыкIоу зыпишIын щымыIэм къыIугушIозэ ны­жъым къыреIо:
— А Шамик, мыр Къур­Iан тхылъ лъапI, джэ­гуалъэп, бгъэчэрэгъуи хъущтэп, умыщынэным пае къыпфязгъэтхыгъ.
— Ара, нан, дэгъуба адэ, сыщынэнэп, — анахь иным фэдэу ыIэ цIыкIу­хэр ыпчанэ ригъэуцуа­гъэу щыт. ТакъикъкIэ, зыгорэ ыгу къызэрэкIыгъэр мыгъуащэу, инанэ къечъалIи IаплI къырищэкIыгъэу къыреIо:
— Нан, моу ащыгъум джыри мыщ фэдэ сымышъхьахынэу къыс­фягъэтхыба.., — зэхихыгъэм нэнэжъыр къыщигъэутагъ.