Илъэсым иохътэ анахь бэрэчэтхэм гъэмафэр ащыщ. Тиреспубликэ игъэмафэ стыр, гурытымкIэ, мэфи 140-рэ фэдизрэ мэхъу. Мы уахътэм ощххэр нахь зэпэух, ау мазэм заулэрэ ахэр къы­хэфэх. Мэкъуогъур тыгъэпсы, гъушъэ, фабэ. Мы мазэм пкIышъхьэ-мышъхьэхэр – черешнер, абрикосыр, чэрэзыр, цумпэр, малинэр, голубикэр къызэлъэхъух; хэтэрыкIхэри – картофыр, къэбаскъэр, нэшэбэгур, бжьын-бжьыныфхэр, къоныр, укроп-петрушкэхэр хъои къэхъух, аузэ бэдзэр мэкIайхэри къэбаижьых.
Мы мазэм ыкIэм хьэр къызэлъэхъу ыкIи иIухыжьын рагъажьэ. Гъэмафэр ини цIыкIуи къякIу: пкъышъолым жьи пси хэхьэ, хэти гуапэу жьы къещэ, пшхыщтыри хъоеу къызэлъэхъу витамин закIэу. Псыхъохэр ыкIи хыр, къагъэжъуа­гъэхэм фэдэу, къэстырых. ПшIоигъо къодыемэ, пшхыщтыри, зызыщыбгъэпсэфыщтыри хъои, мэзхэр чъыIэтэгъэ-гуIэтыпIэх, цIыфхэр замыбэлэрэгъэу, ахэм афэсакъхэмэ, ежьхэм къашъхьапэ­жьыщт. Мэзхэм уц Iэзэгъу зэфэшъхьафхэри, къэгъэгъэ гъэшIэгъон зэмылIэужыгъохэри къащэкIых, а зэкIэ Адыгеим ичIыопс ибаиныгъэх.
Къушъхьэхэр – бжьышIох, лъагэх, пкъыех, тарихъ шъэфыбэр ахэгощагъ. Ти Адыгеи икъушъхьэхэр зекIо кIуапIэх, псыкъефэххэр, къушъхьэтхы лъагэхэр нэплъэгъур зэзыубытылIэрэх. Тикъушъхьэ мэзхэм тыгъужъи, баджи, мэзыкъуи, тхьакIумкIыхьи уащыIукIэщт. ШIуагъэ хэлъэу зызыгъэпсэфы зышIоигъохэмкIэ Адыгеим ичIыопс зымыуасэ щыIэп. Къушъхьэжьы къабзэр, псыхъопсы фабэр цIыфымкIэ Iэзэгъу шъыпкъэх. Ащ фэдэ мафэхэр, тхьамафэхэр, щэч хэмылъэу, цIыфым ипсауныгъэкIэ федэшхох, уигупсэ чIыпIэм ичIыопс упэблэгъэным гур еузэн­кIы, уипсауныгъэ егъэпытэ.