Урысыем щынэгъончъэнымкIэ и Совет и Секретарэу Сергей Шойгу тхьамэтагъор зыщызэрихьэгъэ зэIукIэу Астрахань щыкIуагъэр Къыблэ федеральнэ шъолъырым хэхьэрэ регионхэр щынэгъончъэнхэмкIэ зигъо Iофыгъохэм афэгъэхьыгъагъ.

ЗэIукIэм хэлэжьагъэх УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр, федеральнэ министерствэхэмрэ ведомствэхэмрэ ялIыкIохэр, Къыблэ федеральнэ шъолъырым хэхьэрэ регионхэм япащэхэр. Адыгеим ыцIэкIэ АР-м и ЛIышъхьэу КъумпIыл Мурат ащ хэлэжьагъ.
Къэбар нэпцIхэр аIэкIагъахьэхэзэ, цIыфхэм психологическэу зэратеIункIэ­хэрэм апэуцужьыгъэн, шъыпкъагъэр зылъэпсэ къэбархэр цIыфхэм алъыгъэIэ­сыгъэнхэмкIэ амал тедзэхэр зехьэгъэнхэ зэрэфаем епхыгъэ Iофыгъохэм мыщ щатегущыIагъэх.
УФ-м щынэгъончъэнымкIэ и Совет и Секретарь зэIукIэм къызэрэщыхигъэщыгъэмкIэ, къэбар нэпцIхэр зэрамыхьанхэм пае анахьэу анаIэ зытырагъэтын фаер къэралыгъо къулыкъухэм якъэбарлъыгъэ­Iэс системэхэмрэ критическэ информационнэ инфраструктурэмрэ икъоу ухъу­мэгъэнхэр ары.
Владимир Устиновым Къыблэ федеральнэ шъолъырым хэхьэрэ регионхэм яоперативнэ штабхэм игъо афилъэгъугъ къэбар нэпцIхэр зэрахьан зэралъэкIыщтымкIэ цIыфхэм игъом макъэ арагъэ­Iунэу ыкIи ахэр зэрэнэпцIхэр агурагъэ­Iонэу.
Владимир Устиновым зэIукIэм зэрэщыхигъэунэфыкIыгъэмкIэ, 2023-рэ илъэсым Къыблэ федеральнэ шъолъырым иинтернет-амал зэфэшъхьафхэр гъогогъу мин 27-м ехъу агъэплъэхъухэ ашIои­гъуагъ. УФ-м и Президент и Полномочнэ лIыкIо къызэриIуагъэмкIэ, къэбарлъыгъэ­Iэс системэхэм яухъумэнкIэ гумэкIыгъохэм адиштэу ищыкIэгъэ амалхэр зэрахьэх.
Культурнэ-просветительскэ Iофтхьа­бзэ­хэм язэхэщэнкIэ, Урысыем уасэ зы­щыфашIырэ цIыфыгъэ шэпхъэ дахэхэр ыкIи унэгъо хабзэхэр зэлъягъэшIэгъэнхэмкIэ пшъэрылъхэр Къыблэ федеральнэ шъолъырым хэхьэрэ регионхэм афа­шIыгъэх. Джащ фэдэу хабзэм димыштэу кощы зышIоигъохэм ягъогупэ пабзыкIынэу, IэкIыб къэралхэм къарыкIыхэрэр щыIэныгъэм хэгъэгъозэгъэнхэмкIэ, ахэм урысыбзэр, зыхэхьагъэхэм якультурэ, ятарихъ ягъэшIэгъэнымкIэ Iофэу ашIэрэр агъэлъэшынэу пшъэ­рылъ афашIыгъ.
АР-м и ЛIышъхьэ зэIукIэм зэрэщыхигъэунэфыкIыгъэмкIэ, информационнэ щынэгъончъагъэ республикэм илъыным Адыгеим лъэшэу гъунэ щылъафы, терроризмэм пэуцужьыгъэнымкIэ, патриотическэ пIуныгъэмкIэ Iофтхьэбзэ гъэнэфагъэхэр щызэрахьэх. Общественнэ организациехэр, ныбжьыкIэ объединениехэр, Къэралыгъо фондэу «Хэгъэгум иухъумакIохэр» зыфиIорэм ишъолъыр къутамэ, шъолъыр гъэIорышIэнымкIэ Гупчэр мыщ фэдэ IофшIэным къыхагъэ­лажьэх. Урысые общественнэ-къэралыгъо просветительскэ организациеу «Урысые обществэу «ШIэныгъ» зыфиIорэм дыряIэ зэдэлэжьэныгъэм ишIуагъэкIэ мы лъэныкъомкIэ Iофэу ашIэрэм джыри нахь зырагъэушъомбгъущт.

Шъугу къэтэгъэкIыжьы 2024-рэ илъэсым Дунэе экономическэ форумэу Петербург щыкIуагъэм Адыгэ Республикэмрэ Урысые обществэу «ШIэныгъэмрэ» зэдэлэжьэныгъэ зэрэзэдыряIэщтымкIэ зэ­зэгъыныгъэ зэрэщызэдашIыгъэр. Ащ къызэрэщыдэлъытагъэмкIэ, гъэсэныгъэ IофшIэным нахь зырагъэушъомбгъущт, хэгъэгум итарихъ, ащ хэхъоныгъэу ышIыгъэхэм афэгъэхьыгъэ шIэныгъэхэр цIыф­хэм нахь икъоу алъагъэIэсыщтых. КъумпIыл Мурат зэрэхигъэунэфыкIыгъэмкIэ, мы IофшIэным къэбарлъыгъэIэс полити­кэм, цIыфхэм уасэ зыфашIырэ шIуагъэхэр зэлъягъэшIэгъэнхэм, ныбжьыкIэхэм Iоф адэшIэгъэным, терроризмэмрэ неонацизмэмрэ яидеологие зыдырамыгъэ­хьыхынымкIэ сыдигъуи чIыпIэшхо щиубы­тыщтыгъ.
«Урысыем щынэгъончъэнымкIэ и Со­вет изэIукIэ къыщагъэуцугъэ пшъэрылъхэр зэкIэ дгъэцэкIэщтых. Терроризмэмрэ неонацизмэмрэ яидеологие зыдырамыгъэ­хьыхынымкIэ амал тедзэхэр зетхьащтых. Сыдигъуи фэмыдэу непэкIэ ар зигъо Iо­фыгъоу щыт. ТицIыфхэм къэбар нэпцI­хэр къыхагъэщынхэмкIэ, къэбарэу ахэм къаIэкIахьэхэрэм тэрэзыр къахахынымкIэ IэпыIэгъу тафэхъуным мэхьанэшхо иI», — къыIуагъ республикэм и ЛIышъхьэ.